A Xunta imparte portugués en cen centros con 6.300 estudantes, un 40% máis que en 2023
A Xunta de Galicia imparte materias de lingua portuguesa en cen centros con máis de 6.300 alumnos matriculados, o que supón 2.550 máis que hai dous anos e un incremento do 40 %. Así o anunciou hoxe o secretario xeral da Lingua, Valentín García, na Comisión 4ª do Parlamento de Galicia, onde informou das liñas de actuación do Goberno autonómico neste 2025 ao abeiro da coñecida Lei Paz Andrade para o aproveitamento dos vencellos coa lusofonía.
Neste sentido, destacou o compromiso da Xunta por reforzar esta conexión cultural, especialmente entre a mocidade, "facéndolles ver os beneficios da proximidade entre as dúas linguas e a gran vantaxe que supón utilizalas para abrirnos ao mundo a través dos países de fala portuguesa". Subliñou ademais que o galego, "alén de ser un valor cultural e identitario, tamén nos conecta cunha comunidade de máis de 260 millóns de persoas que teñen o portugués como idioma".
Segundo os datos facilitados, máis de 4.900 estudantes cursan portugués en Secundaria, máis de 1.000 en Bacharelato e 300 en ciclos de FP. A estes súmanse as 1.068 persoas matriculadas nas Escolas Oficiais de Idiomas, o que eleva a cifra total a máis de 7.000. O responsable de Lingua incidiu tamén no aumento de centros que ofrecen esta materia neste curso, pasando de 69 a 100.
No ámbito universitario, García lembrou a creación dun lectorado de galego na Universidade de Mozambique, o primeiro en África, que se suma aos existentes en Brasil e Portugal, así como ás accións de cooperación en Guinea Bissáu, Cabo Verde e Angola. Tamén salientou a posta en marcha da Cátedra Institucional Carvalho Calero na Universidade de Santiago, nacida dun convenio coa Consellería de Cultura, Lingua e Xuventude e o Parlamento de Galicia.
En canto á planificación lingüística, apuntou que a renovación do Plan xeral de normalización da lingua galega incorpora por primeira vez a lusofonía como eixo central, "para promover e poñer en valor o galego a nivel internacional".
Por último, lembrou a creación do Observatorio da Lusofonía, órgano integrado polas entidades galegas máis relevantes, que ten como misión asesorar, identificar necesidades e impulsar medidas neste ámbito.