A Xunta pide “xenerosidade” para avanzar na descentralización de Medicina na Coruña e Vigo
A descentralización dos estudos de Medicina en Galicia segue a dar pasos firmes. Así o comunicaron os conselleiros de Educación, Ciencia, Universidades e Formación Profesional, Román Rodríguez, e de Sanidade, Antonio Gómez Caamaño, tras facer balance da terceira reunión do grupo de traballo que aborda esta cuestión. O obxectivo: garantir unha formación de máxima calidade para os futuros médicos, integrando os recursos e o talento dos hospitais galegos.
Durante o encontro celebrado, confirmouse a vontade compartida de avanzar na descentralización da docencia de Medicina, ampliando a medida aos cursos de 4º e 5º, sumándose así ao modelo xa existente en 6º. A proposta inclúe a creación de unidades docentes en Vigo e A Coruña que integren profesorado das tres universidades galegas: Santiago de Compostela, A Coruña e Vigo.
O conselleiro de Sanidade, Antonio Gómez Caamaño, insistiu en que “é necesario aproveitar ao máximo toda a capacidade formativa e todo o talento que existe nos hospitais galegos”, reiterando que o seu departamento está disposto a poñer todos os recursos do Servizo Galego de Saúde ao servizo da formación sanitaria. “Hai que garantir a máxima calidade da formación aos máis de 1.500 estudantes de Medicina e formar aos mellores médicos para o mañá”, subliñou.
Pola súa banda, Román Rodríguez mostrouse optimista tras as tres reunións mantidas polo grupo de traballo e sinalou que “existe un amplo consenso sobre as vías para descentralizar os estudos de Medicina”. Apuntou tamén que “hai avances e propostas concretas que á volta do verán se agarda pechar”, facendo un chamamento á colaboración: “É necesario que todo o mundo ceda e sexa colaborativo para acadar a mellor fórmula para Galicia, pero tamén para A Coruña, Santiago de Compostela e Vigo”.
Rodríguez destacou a intención da Xunta de descentralizar tanto a docencia práctica como a teórica dos cursos de 4º, 5º e 6º e puxo o foco na creación das devanditas unidades docentes compartidas entre as tres universidades. Ademais, explicou que se está traballando na revisión do convenio de 2015, que establecía un 15 % da docencia fóra de Santiago, co obxectivo de aumentar esa porcentaxe. A previsión é perfilar a proposta definitiva ao longo do mes de agosto para poder acordala no grupo de traballo tras o verán.
Finalmente, aclarou que este proceso non afectará á investigación universitaria: “Os profesores seguirán vinculados aos centros de investigación nos que actualmente levan a cabo o seu labor”.
A Xunta pide, en palabras de ambos conselleiros, “altura de miras, xenerosidade e flexibilidade” para que este proceso redunde na mellor formación posible para os futuros médicos galegos.