Ana López estará no Campionato de Europa tras proclamarse subcampioa da Copa do Rei
Sarria volve situarse no panorama deportivo internacional da man de Ana López Gallego, que representará a Galicia e ao conxunto do Estado no Campionato de Europa que se celebrará en Ereván (Armenia) entre o 25 de febreiro e o 6 de marzo. A cita continental reunirá ás mellores especialistas da disciplina nunha competición do máximo nivel.
A deportista, integrante do Club de Tiro San Juan de Sarria, chega a esta convocatoria tras encadear importantes resultados no ámbito estatal. O pasado fin de semana proclamouse subcampioa da Copa del Rey de Tiro, disputada en Murcia, na modalidade de pistola de aire comprimido a 10 metros na categoría feminina, volvendo así a subir ao podio nunha das competicións máis esixentes do calendario.
Con anterioridade, López Gallego xa lograra a vitoria na primeira fase da Copa Federación de Tiro, celebrada no centro de tecnificación deportiva Prado Salobre, en Logroño, confirmando o seu excelente momento de forma.
Desde o Concello de Sarria trasladaron os seus mellores desexos á deportista nesta nova etapa internacional, amosando o orgullo que supón para o municipio contar cunha representante nunha competición europea de primeiro nivel.