Arranca a segunda semana de mobilizacións dos gandeiros cun atasco de tráfico a causa dos tractores
Os tractores volveron este luns a ocupar as rúas de Lugo coincidindo co inicio da segunda semana de mobilizacións do sector agrario, provocando importantes problemas de circulación en distintos puntos da cidade. As accións impulsadas por Agromuralla e Gandeiros Galegos da Suprema derivaron en longas retencións, especialmente nas zonas do Ceao e da Ronda da Muralla, onde permanecen estacionados desde a pasada semana máis de 150 vehículos agrícolas ocupando un dos carrís.
Ao longo da xornada está previsto que os tractores continúen circulando pola cidade co obxectivo de facer visible a protesta. Ademais, ás dez da noite, os manifestantes volverán concentrarse diante da delegación da Xunta en Lugo, un punto de encontro habitual desde o inicio das mobilizacións. Durante a fin de semana tamén se desenvolveron actos reivindicativos como unha foliada e unha degustación de carne de tenreira, iniciativas que reuniron a numeroso público, maioritariamente profesionais do sector, e que obrigaron a cortar o tráfico nesa contorna da Muralla.
As protestas prolongaranse este martes cunha presenza continuada de tractores e cunha manifestación a pé convocada para as 12.00 horas, que percorrerá o traxecto entre a sede da Xunta e a Subdelegación do Goberno, nun formato semellante ao xa realizado o pasado venres.
Tanto Agromuralla como Gandeiros Galegos da Suprema fan un chamamento á cidadanía lucense para que se sume ás protestas, advertindo de que as consecuencias das políticas que denuncian non só afectarán ao sector primario, senón tamén á poboación en xeral, que poderá atoparse cunha perda de calidade nos alimentos dispoñibles nos supermercados.
Mentres continúan as mobilizacións, os colectivos convocantes aseguran que seguen á espera dunha resposta das administracións ás que solicitaron reunións, entre elas a Subdelegación do Goberno, a Delegación do Goberno e representantes no Parlamento Europeo do PSOE, PP e Vox. Segundo indicou a presidenta de Agromuralla, Noelia Rodríguez, polo momento non recibiron ningunha comunicación oficial.