Besteiro acusa á Xunta de desatender o incendio de A Rúa e reclama a mobilización de recursos
O secretario xeral do PSdeG, José Ramón Gómez Besteiro, instou ao presidente da Xunta a deixar de “mirar para outro lado” e a asumir a súa responsabilidade en materia de emerxencias e saúde pública. Fíxoo tras unha visita ao Concello de A Rúa, onde o incendio do depósito de Residuos Non Perigosos das Pedreiras leva 12 días activo, converténdose, segundo advertiu, nun problema que xa supera o ámbito local e que afecta directamente á saúde da veciñanza.
Besteiro cualificou de “despreocupación e abandono” a actitude do goberno autonómico, denunciando que o fume e os gases xerados polo lume poñen en risco non só aos habitantes da Rúa senón tamén aos concellos limítrofes. “Non é suficiente limitarse a emitir notas de prensa e controlar a calidade do aire. Trátase dun incendio que require acción inmediata e medios materiais”, remarcou.
O responsable socialista lembrou que a orixe do lume está vinculada ao incendio forestal de Seadur–Larouco e puxo un exemplo gráfico: “Ninguén lle diría a un particular que é responsabilidade súa apagar o lume que está a consumir a súa casa. Aquí está a pasar o mesmo”.
Segundo Besteiro, o ocorrido na Rúa é a proba de que “Rueda sempre está ausente cando hai problemas”. Lamentou que o presidente da Xunta “desapareza cando é necesario dar a cara” e engadiu que esta situación non é illada, senón consecuencia de “17 anos de gobernos do PP nos que o rural quedou atrás, sen apoio nin solucións”.
Na súa visita, Besteiro estivo acompañado pola tenente de alcalde da Rúa, Ana Fernández, quen reclamou a implicación da Xunta. Explicou que a extinción do incendio require mobilizar uns 14.000 metros cúbicos de terras e dotar de equipamento especial ao persoal, unhas medidas que están moi por riba da capacidade dun concello pequeno. Fernández advertiu de que “o incendio seguirá ardendo e contaminando mentres non se poñan recursos enriba da mesa para atallalo”.