Besteiro apoia a petición do alcalde de Lugo para que O Vello Cárcere se sume aos Lugares de Memoria
O secretario xeral do PSdeG, José Ramón Gómez Besteiro, anunciou no Vello Cárcere de Lugo que o Goberno de España dará comezo a próxima semana aos expedientes para declarar o Pazo de Meirás e a Illa de San Simón como Lugares de Memoria Histórica, cumprindo así co compromiso adquirido polo Executivo.
Besteiro subliñou que se trata dun paso fundamental para “combater o esquecemento, o negacionismo e os discursos do odio, e dignificar a memoria das vítimas do franquismo”. Lembrou que esta declaración, prevista na Lei de Memoria Democrática, ofrece unha protección e un recoñecemento especiais a espazos vinculados á represión, cunha función conmemorativa, pedagóxica e reparadora.
O dirixente socialista mostrouse confiado en que, tras este avance, o Vello Cárcere de Lugo tamén se sume á rede de lugares de memoria. Recordou que o alcalde, Miguel Fernández, presentará formalmente a candidatura ante o secretario de Estado de Memoria Democrática a próxima semana, coincidindo cun acto no propio edificio, que hoxe funciona como centro cultural e de memoria democrática.
Previamente, a portavoz socialista e concelleira de Cultura, Ana Abelleira, destacou a simboloxía do Vello Cárcere e sinalou que “non é só un espazo de exposicións e actividades, senón sobre todo un lugar de dignificación, de reparación e de loita contra o esquecemento”. Abelleira lembrou que a rehabilitación do edificio, impulsada polo Concello en 2009, naceu coa vocación de converterse nun referente da memoria democrática en Lugo.
No acto participou tamén a secretaria de Organización do PSdeG, Lara Méndez, que apoiou a reivindicación de que o Vello Cárcere sexa recoñecido oficialmente como Lugar de Memoria Democrática.
Besteiro fixo un chamamento á Xunta para respectar estes recoñecementos e abandonar “actitudes de negación ou banalización da memoria”, en referencia á autorización de festas pirata ou clases de bachata na Illa de San Simón, que cualificou como “unha falta de respecto ás vítimas e ás súas familias”.
“O futuro da nosa democracia constrúese sobre a memoria, a reparación e o recoñecemento das vítimas do franquismo. Non hai futuro sen memoria”, destacou o líder socialista, reivindicando estas iniciativas como ferramentas para garantir o coñecemento ás xeracións máis novas.