CCOO e a Fundación 1.º de Maio debaten en Lugo sobre un modelo eólico xusto para Galicia
Comisións Obreiras e a Fundación 1.º de Maio organizan este venres, 13 de xuño, en Lugo, unha xornada sobre a enerxía eólica, enmarcada no proxecto Sociedade, eólica e traballo; propostas para un modelo de desenvolvemento eólico en Galicia socialmente xusto, impulsado por ambas as dúas entidades.
O encontro celebrarase no Hotel Torre de Núñez e ás 11:30 horas realizaranse declaracións aos medios de comunicación, nas que intervirán Armando Iglesias, secretario de Transicións de CCOO de Galicia; Carlos Martínez Camarero, integrante da Secretaría de Medio Ambiente confederal de CCOO; e Pablo Moros García, representante da Fundación 1.º de Maio.
Esta iniciativa ten como finalidade elaborar propostas para un desenvolvemento sostible da enerxía eólica en Galicia que permitan superar o actual bloqueo da tecnoloxía, favorecendo un impacto positivo sobre o territorio e o emprego e reducindo ao mínimo os efectos ambientais.