CCOO promove na Coruña un debate plural sobre o futuro da enerxía eólica en Galicia
A Coruña converteuse esta semana no epicentro do debate sobre o futuro da enerxía eólica en Galicia, ao acoller o cuarto dos obradoiros organizados polo Sindicato Nacional de CCOO e a Fundación 1.º de Maio (F1M) dentro do proxecto Sociedade, eólica e traballo; propostas para un modelo de desenvolvemento eólico en Galicia socialmente xusto. Esta iniciativa, que conta co apoio da European Climate Foundation (ECF), persegue buscar consensos e propostas concretas para garantir un desenvolvemento sustentable desta tecnoloxía que beneficie tanto ao territorio como ao emprego.
A elección da Coruña non foi casual. Trátase da provincia galega que concentra máis do 33 % da capacidade de xeración eólica da comunidade —uns 3.900 megawatts en total—, o que a sitúa como referente clave neste ámbito.
No obradoiro, celebrado na sede comarcal de CCOO, participaron representantes das administracións locais e autonómicas, empresas, universidades, organizacións ecoloxistas, entidades sociais e o propio sindicato. As persoas asistentes analizaron a situación actual da eólica terrestre en Galicia, unha tecnoloxía cunha longa traxectoria pero que nos últimos anos atravesa unha etapa de estancamento, provocada en boa parte pola xudicialización de numerosos proxectos.
Durante o encontro, "manifestaron diferentes perspectivas e buscáronse propostas de consenso que permitan un desenvolvemento eólico xusto, que facilite a optimización das vantaxes desta tecnoloxía, a minimización dos seus inconvenientes e o retorno de beneficios aos territorios máis aló das contraprestacións estritamente económicas".
O proxecto ten como eixo central o impulso dun diálogo construtivo entre os diversos axentes implicados, especialmente nun contexto de crecente tensión social arredor da implantación de novos parques eólicos. "Partimos da necesidade dunha transición enerxética ineludible e do imperativo de que se leve a cabo de forma ordenada e xusta, evitando os desequilibrios territoriais e compatibilizando a creación de emprego e a mellora das condicións de vida e traballo da poboación coa preservación do medio ambiente e do patrimonio natural e cultural".
A cita da Coruña súmase ás xa celebradas en Vigo, Ourense e Ferrol. O ciclo pecharase este venres cun último obradoiro na cidade de Lugo. As conclusións de todos estes encontros serán recollidas nun documento final que incluirá unha serie de propostas concretas para avanzar nunha transición enerxética equitativa en Galicia, documento que será remitido aos principais representantes políticos do país.