CCOO, UXT e CSIF reclaman o reforzo dos servizos públicos
As organizacións sindicais UGT, CCOO e CSIF levaron este 30 de outubro as súas mobilizacións ás portas do Ministerio para a Transformación Dixital e da Función Pública e, simultaneamente, ás Delegacións e Subdelegacións do Goberno en todo o país, incluída a cidade de Lugo, para reivindicar un reforzo decidido dos servizos públicos e alertar do seu progresivo deterioro.
As centrais denunciaron que o Estado do Benestar se atopa nun momento crítico e insistiron en que o esgotamento de recursos, a falta de persoal e o envellecemento das plantillas están a traducirse nun empeoramento evidente da atención á cidadanía en ámbitos como a Sanidade, a Educación, os Servizos Sociais ou a Xustiza, así como na tramitación administrativa diaria.
Os sindicatos lembraron que esta situación non é descoñecida para o Goberno, ao que acusan de non actuar pese ás advertencias trasladadas desde hai anos. Subliñaron que a desmotivación e a sobrecarga laboral do persoal público derivan nunha peor calidade do servizo e nun incremento do malestar social.
UXT, CCOO e CSIF reclamaron a reapertura inmediata da mesa de negociación para pactar subas salariais, melloras laborais e máis contratación pública, advertindo de que, ante o que consideran unha falta de resposta por parte do ministro Óscar López, manterán as mobilizacións e non descartan convocar unha folga xeral.
As organizacións animaron ás traballadoras e traballadores públicos, así como ao conxunto da cidadanía, a participar nas futuras accións, sinalando que só mediante unha planificación a longo prazo e o diálogo se poderá garantir unha administración moderna, eficaz e recoñecida pola sociedade.