Cinco casos de gripe aviaria detectados en gaivotas silvestres en Galicia
Cinco exemplares de gaivotas silvestres deron positivo en gripe aviaria de alta patoxenicidade (IAAP) tras as análises realizadas polo Laboratorio Central de Veterinaria de Algete (Madrid). Os casos corresponden a catro gaivotas patiamarelas (Larus michahellis) recollidas en Arteixo, Abegondo e Miño (A Coruña) e en Foz (Lugo), e a unha gaivota sombría (Larus fuscus) atopada en Bueu (Pontevedra).
Os animais foron trasladados aos Centros de Recuperación de Fauna Silvestre de Oleiros, Carballedo-Cotobade e O Veral, onde se efectuaron as probas necesarias antes da eliminación dos cadáveres conforme á normativa.
Estes cinco positivos constitúen os primeiros focos confirmados en Galicia neste 2025. Ao tratarse de aves silvestres, non se aplicarán restricións adicionais ás xa en vigor, que afectan principalmente aos concellos declarados Zonas de Especial Risco. Nestes municipios, situados nas provincias da Coruña, Lugo e Pontevedra, mantéñense medidas de prevención relacionadas coa cría ao aire libre e coas concentracións de aves, revisión que se actualiza semanalmente segundo a evolución epidemiolóxica.
As autoridades lembran a importancia de reforzar a bioseguridade nas explotacións avícolas, tanto profesionais como domésticas, evitando o contacto con aves silvestres. Recoméndase comunicar de inmediato calquera sospeita aos Servizos Veterinarios Oficiais ou ao teléfono 012.
O virus detectado é do serotipo H5N1, que non se considera transmisible ás persoas. Porén, por precaución, desaconséllase manipular aves enfermas ou mortas atopadas no medio natural.