Controlados a práctica totalidade dos incendios de Ourense e extinguido o da Fonsagrada
A loita contra os incendios en Galicia continúa avanzando e nas últimas horas a situación mellorou de forma notable, despois de que a Consellería do Medio Rural dese por controlados tres grandes focos na provincia de Ourense. Entre eles atópase o de Larouco, considerado o maior lume rexistrado na historia da comunidade, con arredor de 30.000 hectáreas calcinadas e que afectou tamén a Quiroga, onde arderon preto de 9.000.
Segundo a última información facilitada pola Xunta, na actualidade seguen activos dous incendios forestais: o de Avión, na parroquia de Nieva, que comezou o pasado domingo e afecta xa unhas 250 hectáreas; e o da Pobra do Brollón, en Lugo, iniciado o luns ao mediodía, que chegou a obrigar á activación da situación 2 de emerxencia, xa desactivada, e que suma unhas 900 hectáreas queimadas. Este lume afectou principalmente a Quiroga de novo e tamén saltou a Ribas de Sil, sen que ardesa máis ca unha hectárea.
O resto de focos permanecen estabilizados ou controlados. A principal novidade prodúcese en Ourense, coa progresiva consolidación do control do incendio de Larouco. Así mesmo, quedaron controlados os lumes de Chandrexa de Queixa, en Requeixo e Parafita —mentres que o de Vilariño de Conso continúa estabilizado—, con 19.000 hectáreas afectadas, e o de Carballeda de Avia-Beade, con 4.000 hectáreas.
Na mesma provincia deron tamén por controlados os incendios da Mezquita (10.000 hectáreas), Oímbra-Xinzo de Limia (17.000 hectáreas), Vilardevós-Vilar de Cervos (900 hectáreas), Montederramo (120 hectáreas) e Maceda (3.500 hectáreas), mentres que continúa estabilizado o de Carballeda de Valdeorras-Casaio, cunha superficie arrasada de 5.000 hectáreas.
Na provincia de Lugo, ademais do lume activo da Pobra do Brollón, xa se conseguiu extinguir o incendio da Fonsagrada, na parroquia de San Pedro de Río, que afectou a 53,47 hectáreas. Nos traballos de extinción participaron dous técnicos, 17 axentes, 30 brigadas, 28 motobombas, dúas palas, tres helicópteros e catro avións.