Declaradas 121 zonas catastróficas tras os incendios na peor vaga de calor desde 1975
O Consello de Ministros aprobou a declaración de zona catastrófica para os territorios afectados polos incendios forestais e polas inundacións rexistradas desde o pasado 23 de xuño en 16 comunidades autónomas. Trátase, segundo informou o Goberno, da maior emerxencia forestal dos últimos oito anos, con 121 áreas arrasadas polas lapas, 115 delas por grandes incendios.
A medida permitirá que os particulares, empresas e administracións poidan reclamar axudas económicas para paliar os danos sufridos. Segundo explicou o ministro do Interior, Fernando Grande-Marlaska, “abrimos a vía para que os prexudicados reciban as compensacións que lles corresponden”.
A declaración abrangue non só os danos materiais senón tamén os efectos sobre a seguridade social, o emprego, a agricultura e outros sectores produtivos. O Executivo comprometeuse a coordinarse coas comunidades autónomas para articular os plans anuais de prevención e vixilancia dos montes, un dos puntos débiles sinalados polos informes técnicos.
A situación é especialmente grave en Extremadura, Castela e León, Galicia e Asturias, rexións onde se rexistraron os incendios máis devastadores. En Galicia, declarouse unha única área catastrófica na provincia de Lugo, mentres que Ourense concentrou a maior parte dos danos, con máis dunha decena de lumes de grandes dimensións.
Marlaska insistiu en que “a prioridade é minimizar os riscos e evitar a perda de vidas humanas”, lembrando que este verán xa se rexistraron falecementos por mor do lume e tamén polas inundacións. O ministro puxo como exemplo a resposta de emerxencia despregada en Zamora, León e Ourense, onde os efectivos traballaron en condicións extremas durante semanas.
O Goberno tamén fixo un chamamento a un Pacto de Estado fronte ao cambio climático. “É o momento de reflexionar con serenidade, pero tamén con decisión, sobre os retos que temos por diante”, apuntou Marlaska, quen cualificou a emerxencia climática como “un desafío global” que require cooperación internacional.
Segundo Protección Civil, a evolución dos incendios depende en gran medida da meteoroloxía. As altas temperaturas e o vento seguen a ser factores determinantes, polo que non se descarta que a vaga de lumes continúe activa ata finais do verán.
En canto ás axudas, o Consello de Ministros comprometeuse a actuar con “máxima celeridade” para que os damnificados poidan recuperar canto antes infraestruturas públicas e bens privados. “Estamos ante unha emerxencia que marcará un antes e un despois na xestión forestal e na prevención de riscos en España”, concluíu Marlaska.
TIPOS DE AXUDAS
O acordo do Consello de Ministros recolle as axudas directas competencia do Ministerio do Interior destinadas a paliar danos persoais; materiais en vivenda e aveños; gastos de corporacións locais; en establecementos industriais, mercantís e de servizos, e a persoas físicas ou xurídicas que realizasen prestacións persoais e de bens.
Tamén prevé a posibilidade de que o Organismo Autónomo Xefatura Central de Tráfico aprobe unha exención das taxas para xestións como duplicados de permisos de circulación ou condución, así como baixas de vehículos sinistrados, e tamén para a expedición do DNI.
Outra medidas competencia doutros ministerios poderán ser determinados beneficios fiscais (Ministerio de Facenda), medidas laborais e de Seguridade Social (Ministerios de Traballo e Economía Social, e de Inclusión, Seguridade Social e Migracións) e axudas ás corporacións locais (Ministerio de Política Territorial e Memoria Democrática) ou subvencións por danos en producións agrícolas, gandeiras, forestais e de acuicultura (Ministerio de Agricultura, Pesca e Alimentación).
Os restantes departamentos ministeriais, no ámbito das súas competencias, poderán declarar zona de actuación especial así como a emerxencia das obras para reparar os danos causados en infraestruturas de titularidade pública situadas nas zonas afectadas por estas emerxencias de protección civil.
ZONAS AFECTADAS
Entre as áreas declaradas en Ourense están Viladervós, Maceda-Teixeira, Verín, Chandrexa, Maceda-Santiso, Oímbra, A Mezquita e Larouco-Seadur. Na Coruña figuran Ponteceso, Camariñas e Torques e en Lugo Carballedo-A Cova.