Dúas triatletas paralímpicas galegas no novo Equipo Promesas Paralímpicas Caixabank
Dúas triatletas galegas foron seleccionadas para formar parte do novo Equipo CaixaBank de Promesas Paralímpicas de Tríatlon 2025, tras a celebración da Toma de Tempos de Tríatlon Paralímpico o pasado 22 de febreiro en Alcobendas, Madrid. A Federación Española de Tríatlon (FETRI) anunciou a lista definitiva tras avaliar os resultados, as clases deportivas e a posible proxección dos aspirantes.
Entre as novas integrantes do equipo atópanse Claudia Tubío Quintáns, do Club Tríatlon Rianxo, e Carla Santoro Cernadas, do Club Deportivo Delikia. Claudia Tubío xa formou parte do equipo CaixaBank na tempada 2023-2024 e debutou competindo na súa terra na Copa do Mundo de Tríatlon Paralímpico, celebrada en xuño de 2024 en Vigo. Carla Santoro, pola súa banda, inicia a súa traxectoria no tríatlon paralímpico con esta selección e co respaldo deste programa.
O Equipo CaixaBank de Promesas Paralímpicas de Tríatlon é un proxecto conxunto entre FETRI e o Comité Paralímpico Español, que naceu en setembro de 2020 co obxectivo de fomentar novos talentos con discapacidade que poidan reforzar no futuro a selección española. O programa ten como obxectivo a participación en competicións internacionais con vistas aos Xogos Paralímpicos de Los Ángeles 2028.
Tanto Claudia como Carla participarán en concentracións durante a tempada 2025-2026, onde recibirán formación en áreas como técnica, clasificación, nutrición e mecánica, ademais de adestramentos específicos en natación, ciclismo, carreira e transicións.