Folga no ensino público contra a política de recortes e a propaganda da Xunta
A CIG-Ensino anunciou este 1 de setembro de 2025 a convocatoria dunha xornada de paro o 25 de setembro e dunha manifestación nacional o sábado 13 como inicio dun curso de mobilizacións baixo o lema “Rectificar, recuperar e recoñecer”. A central sindical argumenta que o profesorado galego traballa “coas peores condicións laborais no contexto educativo máis complexo das últimas décadas” e que é preciso abrir de inmediato a negociación cunha táboa reivindicativa básica.
Entre as demandas figuran a baixa inmediata de ratios en todas as etapas, a recuperación do horario lectivo previo aos recortes, o incremento de persoal especialista para atender a diversidade e de profesorado para apoios, reforzos e desdobres, a eliminación da burocracia inútil e o recoñecemento e dignificación da profesión docente en termos retributivos e administrativos. Se non hai avances “nun mes”, avisan, intensificaranse as mobilizacións.
A secretaria nacional, Laura Arroxo, criticou a política de “recortes, privatizacións, censura e propaganda” da Consellaría de Educación, especialmente “desde a etapa de Rueda” ao fronte da Xunta. Sinalou o incremento de xubilacións anticipadas e excedencias, a carga burocrática abafante, o peor horario lectivo en secundaria, FP e réxime especial “de todo o Estado” e unha privatización crecente na FP coa figura do docente asociado. Tamén denunciou o uso de fondos europeos para “parchear necesidades estruturais” e a “obsesión pola imaxe e o control pedagóxico”.
No ámbito do cadro de persoal, a CIG-Ensino asegura que a cifra de 30.424 docentes permanece conxelada nos últimos catro anos e que non se cubriron todas as xubilacións tras as oposicións do verán, quedando desertas o 33% das 1.664 prazas. Ademais, medran as vacantes con afíns e redúcense prazas provisionais en infantil e primaria, mentres se pechan unidades e escolas e se comparten postos de orientación.
O sindicato reclama medidas retributivas como o pago do verán ao persoal substituto, igualdade salarial do profesorado especialista de sectores singulares de FP co de Secundaria e subas nos complementos autonómicos. Critica tamén a parálise do Plan de Igualdade, o recorte de licenzas formativas, a eliminación da Rede de Acompañamento e Orientación e a introdución de criterios de “neutralidade ideolóxica” nas programacións dos centros.
De cara a setembro, a CIG-Ensino percorrerá máis de 1.000 centros para realizar asembleas e contrastar co profesorado uns “mínimos esixíbeis” na negociación coa Consellaría. Chama á unidade do colectivo docente e á implicación de familias, alumnado e cidadanía nas mobilizacións: manifestación nacional en Santiago o sábado 13 e folga xeral no ensino público o xoves 25, cunha marcha que rematará diante da Consellaría.