Friol abre as portas ao primeiro centro de atención integral ao autismo de Galicia
Friol dá un paso adiante coa presentación oficial do primeiro centro de atención integral a persoas con autismo en Galicia, un proxecto cualificado como “pioneiro e vangardista” que foi recibido con entusiasmo por administracións, asociacións e familias. O acto, organizado polo Concello, tivo lugar nunha carpa situada xunto ao espazo onde xa comezaron as obras, na rúa do Carballal. A infraestrutura, que ocupará unha parcela que combina zona urbana e rústica, permitirá integrar dous enfoques para a atención ás persoas con TEA.
O evento foi inaugurado polo alcalde de Friol, José Ángel Santos, quen agradeceu a colaboración de todos os implicados e destacou especialmente o apoio financeiro da Xunta, que destinará 4 millóns de euros ao proxecto. “Este centro representa a unión das administracións públicas en prol das persoas con autismo e as súas familias”, declarou Santos, quen asegurou que marcará “un antes e un despois” para Friol, para Galicia e para o colectivo TEA.
Mercedes Fernández, presidenta da Federación de Autismo de Galicia, salientou a relevancia deste centro, que se converterá nun apoio esencial tanto para as persoas con Trastorno do Espectro Autista como para os seus familiares. Durante a súa intervención, lembrou que actualmente hai 27.000 persoas con autismo en Galicia, unha cifra en aumento, e subliñou a necesidade de crear espazos que garantan unha vida digna e con dereitos iguais para estas persoas. “Non podemos seguir recaendo o peso dos coidados só nas familias; necesitamos recursos como este centro para fomentar a autonomía e a independencia das persoas con TEA”, afirmou Fernández.
OS DETALLES DO PROXECTO
O proxecto, que estará xestionado por Aspanane, contará cun edificio de 3.200 metros cadrados distribuídos en catro plantas. O soto albergará os servizos comúns, como a cociña, lavandería, vestiarios, garaxe e salas de instalacións. Na planta baixa situaranse os talleres, unha aula de psicomotricidade, salas de reunións e as áreas administrativas. As dúas plantas superiores acollerán tres módulos autónomos de oito persoas por planta, cunha capacidade total para 48 usuarios, e algúns módulos estarán destinados ao respiro familiar.
No acto tamén participou o recoñecido especialista en xenética Ángel Carracedo, quen emocionou aos asistentes cunha intervención centrada na orixe do trastorno, as necesidades de coidado e os avances na investigación. Carracedo destacou que o centro de Friol é un exemplo de como os pacientes poden estar máis próximos aos seus fogares, algo esencial na atención integral.
Fabiola García, conselleira de Política Social, pechou o evento resaltando que o centro será “un recurso pioneiro que converterá Galicia nun referente na atención ao autismo, ao tempo que contribuirá á creación de emprego e ao asentamento de poboación no rural”. Ademais, García subliñou que este proxecto responde a unha demanda histórica das familias e reafirmou o compromiso da Xunta cunha sociedade máis aberta, plural e inclusiva.
A conselleira tamén agradeceu o traballo de Aspanane, que xestionará o centro, destacando a súa traxectoria de máis de 40 anos na atención ás persoas con TEA e garantindo que esta experiencia será clave no éxito do proxecto.
