Galicia brilla nos Mundiais de Tríatlon de Wollongong
A gran festa mundial do tríatlon aterrou en Wollongong (Australia) cunha intensa programación que incluíu probas élite, Sub-23, júnior, relevos mixtos e o Campionato do Mundo de Tríatlon Paralímpico.
A fin de semana estivo marcada por un excelente resultado para España, coa medalla de prata de David Cantero na Gran Final das Series Mundiais, un fito que non se repetía desde as preseas de Mario Mola e Fernando Alarza en Lausana 2019.
O peche do evento tivo un momento especialmente emotivo para o tríatlon español, co traspaso de bandeira a Pontevedra, que recibiu oficialmente a sede da Gran Final do Campionato do Mundo 2026, nun acto encabezado polo presidente da FETRI, José Hidalgo.
María Casals, a mellor española nas categorías Sub-23 e Júnior
As competicións comezaron coa categoría Sub-23, onde a triatleta María Casals, do Club Cidade de Lugo Fluvial e con licenza galega, asinou unha destacada actuación ao finalizar en quinta posición, moi preto das medallas.
Na proba masculina, o galego Esteban Basanta, tamén do Cidade de Lugo Fluvial, conseguiu entrar no Top 10 ao rematar noveno, a pesar de sufrir unha caída no accidentado segmento ciclista.
Na categoría júnior, o galego Damián Suárez, do Club Deportivo Delikia, cruzou a meta no posto 20º tras unha sólida actuación nos segmentos de natación e ciclismo.
Susana Rodríguez conquista o seu sétimo título mundial
No Campionato do Mundo de Tríatlon Paralímpico, a galega Susana Rodríguez, xunto coa súa guía Sara Pérez Sala, revalidou o seu dominio mundial ao acadar o seu sétimo título mundial.
O equipo español de relevos mixtos, formado por Susana Rodríguez, Sara Pérez Sala, Eva Moral e Nil Ruidavets, quedou ás portas do podio, cunha meritoria cuarta posición a tan só 20 segundos das medallas.
Ademais, Sara Pérez Sala, atleta catalá con licenza galega, conseguiu tamén unha medalla de bronce en solitario na cita do circuito PTO T100 de Wollongong.
Pontevedra, próxima gran sede mundial
O presidente da FETRI, José Hidalgo, recibiu oficialmente a bandeira de World Triathlon durante a cerimonia de clausura.
Con este xesto, España —e en concreto Pontevedra— convértese na sede da Gran Final do Campionato do Mundo de Tríatlon 2026, reafirmando o liderado galego e nacional no panorama internacional deste deporte.