Galicia mantense sen lumes activos despois dun tráxico mes de agosto
Galicia mantense sen incendios activos de máis de 20 hectáreas, segundo a última actualización da Consellería do Medio Rural publicada na mañá deste venres. A situación estabilizouse desde o mediodía do xoves, logo de varias semanas nas que o lume castigou con dureza distintas zonas do país, sobre todo na provincia de Ourense.
Do total de once incendios que aínda non están oficialmente extinguidos, dous permanecen estabilizados. Trátase do lume da Pobra do Brollón, iniciado o pasado luns na parroquia de Abrence e que afectou unhas 900 hectáreas, e do de Avión, na parroquia de Nieva, con 250 hectáreas queimadas.
Os outros nove focos rexístranse en Ourense e están xa baixo control. O último en ser dominado foi o de Carballeda de Valdeorras, na parroquia de Casaio, que na tarde do xoves quedou controlado tras arrasar arredor de 5.000 hectáreas. Este incendio comezara no municipio zamorano de Porto e, ao cruzar a fronteira, avanzou polas montañas de Trevinca, deixando unha ampla superficie calcinada en territorio galego.
Entre os grandes lumes desta vaga figuran os de maior dimensión da historia recente en Galicia, tamén situados en Ourense e con repercusións na provincia de Lugo. O de Larouco, con orixe en Seadur, queimou unhas 30.000 hectáreas repartidas en ata dez concellos. Pola súa banda, o de Chandrexa de Queixa e Vilariño de Conso arrasou 19.000 hectáreas: o foco de Vilariño permanece estabilizado, mentres que os dous de Chandrexa están controlados.
Tamén seguen controlados os incendios de Oímbra-Xinzo de Limia, con 17.000 hectáreas afectadas; A Mezquita, con 10.000; Carballeda de Avia-Beade, con 4.000; Vilardevós-Vilar de Cervos, con 900; Montederramo, con 120; e Maceda, con 3.500 hectáreas queimadas.
En conxunto, a provincia de Ourense segue a concentrar a maior parte da superficie arrasada polos incendios forestais, nun verán que deixa rexistros históricos e que mantén á comunidade en alerta permanente fronte ao lume.