Jessica Bouzas cae na primeira rolda do US Open ante Donna Vekic
Jessica Bouzas non puido superar o seu debut no US Open e quedou eliminada na primeira rolda do último Grand Slam da tempada. A arousá perdeu ante a croata Donna Vekic nun intenso partido resolto en tres sets (3-6, 7-5, 6-3) tras máis de dúas horas de xogo.
Bouzas, que chegaba ao torneo de Nova York tras unha destacada xira norteamericana, comezou o encontro con firmeza. Adiantouse no primeiro set con rotura a favor e chegou a dominar por 4-2, pechando a manga por 3-6. No segundo parcial, a galega estivo preto de sentenciar, mais Vekic logrou darlle a volta ao marcador e levar o set por 7-5.
No terceiro, a croata impúxose desde o inicio rompendo o servizo da galega. Bouzas chegou a reaccionar no cuarto xogo, pero dous novos break de Vekic —no quinto e no noveno— acabaron coas súas opcións de avanzar no torneo.
A súa rival, Donna Vekic, medirase agora na segunda rolda coa estadounidense Coco Gauff, número 3 do mundo e campioa en 2023, que superou á australiana Ajla Tomljanovic nun duro encontro a tres sets.