Lugo acollerá o Campionato Galego absoluto de natación de inverno na piscina de Frigsa
A cidade de Lugo será a sede do Campionato Galego de Natación Absoluto de Inverno, unha das citas máis destacadas do calendario autonómico desta disciplina, que se disputará os días 27, 28 e 29 de decembro na piscina municipal de Frigsa. O evento reunirá arredor de 400 deportistas dunha trintena de clubs de toda Galicia nunha competición que marcará o peche do ano deportivo a nivel autonómico.
O campionato conta co apoio da Xunta de Galicia e coa colaboración do Concello de Lugo, a través das áreas de Alcaldía, Xuventude e Deportes, ademais de diferentes entidades e patrocinadores que fan posible a celebración desta proba. A organización corre a cargo da Federación Galega de Natación, coa implicación do club anfitrión, o CN PortaMiñá.
Durante tres xornadas, a piscina de Frigsa converterase no epicentro da natación galega absoluta, cun programa competitivo que permitirá medir o nivel dos principais clubs e nadadores do país nun contexto de alto rendemento deportivo, consolidando Lugo como referente na organización de eventos deportivos de ámbito galego.