Lugo convértese na primeira cidade galega en participar nun estudo piloto sobre accesibilidade
O tenente alcalde do Concello de Lugo, Rubén Arroxo, acompañado por Pablo González, do Colexio de Arquitectos Técnicos da Coruña, Javier Núñez, do de Lugo, Antonio Arias, de Pontevedra, e José Grandío, do Consello Galego de Accesibilidade, presentou este xoves un estudo de accesibilidade realizado nas instalacións públicas de Galicia. Arroxo explicou que se trata dunha iniciativa proposta polo Colexio de Arquitectos Técnicos e sinalou que “estamos orgullosos de que Lugo fose a primeira parada deste plan piloto”.
A Tenencia de Alcaldía recibiu recentemente os resultados da análise de 22 edificios municipais, nos que se recollen as deficiencias detectadas e as posibles solucións, “moitas veces cuestións moi pequenas e facilmente realizables que nos permiten seguir mellorando a accesibilidade dos edificios públicos”, indicou Arroxo, quen engadiu que “a accesibilidade é algo no que sempre hai que estar traballando; agora contamos cunha folla de ruta ben definida por onde podemos seguir avanzando”.
O Consello Galego de Accesibilidade levou a cabo en Lugo a primeira experiencia deste tipo grazas á colaboración da Tenencia de Alcaldía, que facilitou o acceso do persoal técnico ás instalacións municipais para auditalas desde o punto de vista da accesibilidade. Cos datos recollidos, creouse un sistema de catalogación por etiquetas que permite clasificar os edificios segundo o seu grao de accesibilidade.
A etiqueta branca, que representa a accesibilidade universal completa, non foi obtida por ningún dos edificios analizados, aínda que o informe destaca que con pequenas modificacións poderían achegarse a esa cualificación. A etiqueta verde, que indica un alto nivel de accesibilidade, foi outorgada ao auditorio Fuxan os Ventos e á Piscina Municipal de Frigsa, espazos que permiten un uso maioritariamente autónomo e dispoñen de itinerarios accesibles, ascensores, aseos adaptados e prazas de aparcadoiro reservadas.
Con etiqueta amarela aparecen edificios que presentan algunhas carencias, como a falta de ramplas, ascensores ou aseos accesibles. Entre eles están o Centro de Servizos Municipais, o Vello Cárcere, a Casa do Concello, o Museo Provincial, a Praza de Abastos, o centro social Uxío Novoneyra, o Auditorio Gustavo Freire, o Centro Social A Milagrosa, o Centro de Convivencia de Fingoi, a Casa das Linguas María Balteira, o Centro de Dinamización Social Lamas de Prado, a Casa da Xuventude e a Piscina Municipal das Pedreiras.
Por último, a etiqueta vermella recolle os espazos que non cumpren os mínimos requirimentos de accesibilidade, especialmente no acceso principal e nos itinerarios interiores. Nesta categoría están a Oficina Municipal de Turismo, a Casa dos Mosaicos, Porta Miñá, o Centro Arqueolóxico de San Roque, o Cemiterio Municipal e os centros de convivencia Maruja Mallo e Sagrado Corazón.
Pablo González, técnico participante no estudo e usuario de cadeira de rodas, destacou que “Lugo é unha cidade bastante cómoda, que obviamente sempre ten puntos de mellora, pero levamos unha grata impresión polo momento”.
O Consello Galego de Accesibilidade continuará agora a auditar outras cidades galegas, como Pontevedra e Vigo, e anunciou que nas vindeiras fases o obxectivo será crear unha aplicación que permita ás persoas con mobilidade reducida coñecer de antemán o nivel de accesibilidade dos diferentes edificios.