Deportes

A Deputación de Pontevedra activa tres liñas de apoio económico para clubs, federacións e entidades organizadoras de eventos deportivos, cun total de 670.000€ en subvencións e 100.000€ para competicións de interese turístico.

O presidente da Deputación de Pontevedra, Luis López, anunciou este martes unha nova inxección de case 800.000 euros en axudas destinadas a reforzar a organización de eventos deportivos na provincia. A presentación tivo lugar no campo de fútbol de A Senra, en Ribadumia, nun encontro co tecido deportivo da comarca do Salnés.

López explicou que esta iniciativa inclúe dúas novas liñas de apoio para clubs, federacións e entidades organizadoras de eventos deportivos, ademais da xa existente subvención para competicións deportivas de interese turístico. “Nunha soa semana, estamos activando case 800.000 euros en axudas para contribuír á organización de eventos deportivos nesta provincia do deporte, que é a nosa”, destacou López, acompañado polos deputados provinciais Javier Tourís e Marcos Guisasola, así como polo alcalde David Castro.

A primeira das novas liñas, dotada con 550.000 euros —50.000€ máis que no 2024— está destinada a clubs deportivos da provincia e federacións autonómicas e españolas para a organización de competicións e eventos deportivos. Esta axuda divídese en dúas categorías:

• Liña 1 (300.000€): competicións federadas de ámbito estatal ou internacional e eventos deportivos de alto impacto.
• Liña 2 (250.000€): eventos oficiais e non oficiais de calquera ámbito territorial non incluídos na Liña 1. A axuda máxima para as entidades beneficiarias desta liña pasa dos 6.000€ do ano pasado aos 12.500€ desta edición.

A segunda novidade é unha liña de axudas de 120.000 euros para a adquisición de bens e servizos necesarios para a organización de eventos deportivos. Esta subvención permitirá financiar materiais como medallas, trofeos, camisetas ou produtos promocionais, así como servizos de asistencia sanitaria, arbitraxe ou retransmisión. Cada beneficiario poderá optar a un máximo de 1.000€.

Finalmente, a Deputación tamén mantén o programa de apoio ás competicións deportivas de interese turístico, cun orzamento de 100.000€.