Economía

A delegada territorial da Xunta en Ferrol visitou hoxe a Xoiaría Rosende, beneficiaria da pasada convocatoria, para destacar os avances logrados coa subvención autonómica. A nova orde de axudas da Consellería de Emprego, Comercio e Emigración está dotada con 3,9 millóns de euros e pode solicitarse ata o 26 de marzo.

Ferrol, 4 de marzo de 2025. A delegada territorial da Xunta en Ferrol, Martina Aneiros, visitou esta mañá a Xoiaría Rosende, en Ferrol, un dos establecementos beneficiados na pasada convocatoria das axudas da Xunta para impulsar a digitalización, innovación e sustentabilidade do comercio minorista e dos talleres artesanais galegos.

Grazas a esta subvención, a xoiaría incorporou un láser óptico de fibra para o corte, marcado e gravado de pezas artesanais, novos módulos expositores, unha báscula de pesado e dúas cámaras de videovixilancia de maior calidade, mellorando tanto os seus procesos produtivos como a presentación dos seus produtos.

A delegada territorial explicou que Xoiaría Rosende foi unha das empresas beneficiarias da pasada convocatoria e lembrou que a Xunta ten aberto o prazo para solicitar a nova orde de axudas ata o 26 de marzo, cun orzamento total de 3,9 millóns de euros.

A convocatoria estrutúrase en tres liñas de axudas:

• Digitalización e innovación comercial, para financiar a implantación e mantemento de páxinas web, ferramentas de posicionamento dixital ou servizos de loxística e-commerce, entre outras accións.
• Modernización comercial, para a mellora da imaxe, eficiencia do local e calidade do produto final, a través da reforma de establecementos, proxectos de interiorismo ou adquisición de maquinaria.
• Sostibilidade ambiental, para reducir a produción de embalaxes e impulsar accións que minimicen o impacto ambiental.

Aneiros destacou que, en todos os casos, a intensidade da subvención será do 80% da inversión subvencionable, unha das principais novidades desta edición, co obxectivo de garantir a competitividade do sector.

Ademais, lembrou que esta orde de axudas se complementa con outros programas de apoio, como os 2,5 millóns de euros para os centros comerciais abertos de Galicia, cuxa convocatoria remata o 19 de marzo, e a nova orde de axudas para a rede de Mercados Excelentes, dotada con 3,3 millóns de euros.