O artista Xosé Couso expón a súa obra abstracta no Vello Cárcere de Lugo

A mostra, aberta ata o 30 de agosto, reúne creacións cheas de formas, cores e texturas tras máis de catro décadas da súa primeira exposición

O pintor Xosé Couso (Pontevedra, 1955) inaugurou no Vello Cárcere de Lugo unha nova exposición, localizada no Bloque de mulleres, segunda planta, que permanecerá aberta ata o 30 de agosto.

A colección está composta por 16 cadros pintados con acrílicos que abarcan técnicas mixtas, volumes, craquelados, pouring, xeométrico e dripping, todos sobre lenzos en bastidor dobre con medidas pouco convencionais, que van desde 50x60 cm ata 120x90 cm, adaptadas ao tema de cada obra.

Segundo explica Couso, a mostra, que xa leva catro semanas aberta, está a ser moi visitada e recibida con interese. Moitas persoas preguntan na recepción pola localización da exposición e, unha vez alí, fotografan os cadros e mostran curiosidade polas formas, temáticas e cromatismos.

O artista destaca que sente “moi estimulante observar que as felicitacións son sinceras e non por compromiso”, e aproveita para seguir estudando e experimentando con novas técnicas en formatos pequenos antes de trasladalas a tamaño grande.

Couso tamén xustifica o intervalo dun ano entre exposicións pola dedicación que require o estudo e traballo das probas, os encargos privados e a súa implicación en outras actividades culturais, como a investigación e documentación para publicar tres biografías sobre artistas galegos, incluíndo ao multidisciplinar vigués Ángel Lemos de los Reyes.

A finais de ano inaugurará unha exposición máis reducida no Círculo de Artesáns de A Coruña, que permanecerá do 2 ao 17 de decembro.

O ARTISTA

O pintor iniciou a súa carreira artística con 21 anos, expoñendo óleos, plumillas, ceras e láminas, compaxinando a pintura coa súa faceta de cantautor.

Aos 27 anos comezou a traballar no mar, mantendo vivo o compromiso de retomar a actividade pictórica tras a xubilación.

Agora, 43 anos despois das súas primeiras exposicións, Couso regresa cunha proposta que convida a mergullarse nun universo plástico diverso e cheo de matices, reafirmando a súa aposta pola creación libre e expresiva.