O artista marinense Xosé Couso expón a súa obra abstracta no Vello Cárcere de Lugo
O pintor marinense Xosé Couso (Pontevedra, 1955) presenta no Vello Cárcere de Lugo unha nova exposición que permanecerá aberta ata o 30 de agosto de 2025, localizada no Bloque de mulleres, segunda planta.
A colección amosa unha ampla variedade de obras abstractas nas que destacan as formas xeométricas, a forza das cores e a riqueza das texturas, combinando diferentes técnicas pictóricas que reflicten unha traxectoria creativa prolongada no tempo.
Couso iniciou o seu camiño artístico con tan só 21 anos, expoñendo óleos, plumillas, ceras e láminas, mentres compaxinaba a pintura coa súa faceta de cantautor. Aos 27 anos comezou a traballar no mar e, durante a súa carreira como mariñeiro, mantivo vivo o compromiso de retomar a actividade pictórica ao chegar a súa xubilación.
Agora, 43 anos despois das súas primeiras exposicións, o artista regresa cunha proposta que convida a mergullarse nun universo plástico diverso e cheo de matices, reafirmando a súa aposta pola creación libre e expresiva.