O BNG reclama unha nova orde de subvencións de incorporación e plan de mellora
O BNG reclama á Xunta de Galicia a convocatoria inmediata dunha nova orde de axudas para a incorporación de mozas e mozos á actividade agraria e plans de mellora, tras a denegación masiva de solicitudes da última convocatoria que deixou fóra o 70 por cento dos posibles perceptores.
A formación nacionalista presentará no vindeiro pleno provincial -o martes 25 de febreiro- unha moción con esta demanda, na que denuncia “a falta de compromiso por parte do goberno co sector no seu conxunto e, nomeadamente, coas granxas que se viron obrigas a facer en moitos casos proxectos técnicos e asumir múltiples gastos para concorrer ás axudas”.
A resolución das axudas, publicadas o pasado 29 de xaneiro, deixa fóra das axudas 434 granxas, fronte as 180 que recibirán as axudas, apenas unhas 30 en toda a provincia de Lugo.
Ademais da convocatoria dunha nova orde con dotación orzamentaria suficiente, a moción reclama introducir criterios redistributivos que eviten a concentración das axudas en menos perceptores ou priorizar granxas con diversificación produtiva e sociedades familiares que incorporen ao seu fillo ou filla.