O Campionato Galego de Kickboxing Absoluto reuniu en Ourense aos mellores loitadores
Este fin de semana celebrouse en Ourense o Campionato Galego de Kickboxing absoluto, reunindo a todas as modalidades e categorías de peso nunha competición cunha alta participación, similar á de edicións anteriores.
O club Free Dojo foi o único representante da provincia de Lugo no torneo e, malia acudir cun equipo de só 15 competidores entre as súas escolas de Lugo e A Coruña, tivo unha actuación destacada. Entre os máis de 120 deportistas que participaron na proba máis importante do kickboxing en Galicia, os loitadores do Free Dojo conseguiron un gran número de medallas.
A competición desenvolveuse ao longo do sábado e o domingo, deixando un notable medalleiro para o club lucense. Destacaron especialmente Hugo Conde e Fredi Mosteirin, que se proclamaron campións galegos. Tamén salientou Miguel Ángel Rey Batán, que conseguiu dous subcampionatos galegos. Ademais, os competidores da escola de A Coruña sumaron outros tres títulos autonómicos, dous subcampionatos e un bronce.
A Federación Galega de Kickboxing e Muaythai expresou a súa satisfacción polo nivel competitivo amosado durante o torneo e polo bo desenvolvemento da competición, que reflicte o crecemento desta disciplina en Galicia e o esforzo de deportistas e equipos técnicos.