O Colectivo de Xubilados e Pensionistas mobilízase por un SAF con recursos e persoal suficiente
O Colectivo de persoas xubiladas e pensionistas da CIG mobilizouse esta mañá nas sete cidades galegas para reclamar un Servizo de Axuda no Fogar (SAF) dotado con recursos e persoal suficiente, que garanta unha atención digna ás persoas dependentes e as súas familias.
A central sindical demanda a creación dun Sistema Público Galego de Servizos de Atención ás Persoas, que xestione todos os recursos públicos, incluído o SAF, para asegurar unhas condicións dignas e xustas para as persoas dependentes. Segundo denuncian, o servizo está actualmente derivado aos concellos, maioritariamente privatizado e sen financiamento suficiente, provocando esperas de máis dun ano para acceder ás prestacións.
Un servizo con carencias estruturais
O colectivo denuncia que en Galicia máis de 2.500 persoas están á espera dunha prestación, con demoras superiores aos seis meses en moitos casos. Ademais, destacan a falta de prazas en residencias e centros de día:
- Galicia conta con 286 centros residenciais, dos cales só 71 son públicos.
- Das 21.952 prazas dispoñibles, apenas 5.016 son públicas fronte ás 16.936 de xestión privada.
- A cobertura en residencias non chega ao 3,5% da poboación maior de 65 anos, cando a OMS recomenda un mínimo do 5%.
- Só existen 252 centros de día en toda Galicia, dos cales apenas 97 son públicos.
Condicións laborais precarias no SAF
O Servizo de Axuda no Fogar presenta graves deficiencias debido á falta de financiamento e á súa xestión privada en moitos concellos. Isto provoca que as traballadoras, na súa maioría mulleres, sufran unha sobrecarga de traballo e unha precarización dos seus dereitos laborais.
Denuncian que o SAF conta con persoal insuficiente, que traballa en condicións de gran esforzo físico e emocional, con salarios baixos e sen recoñecemento. O colectivo esixe unha xestión pública directa da Xunta de Galicia para garantir un servizo universal e equitativo, así como unha mellora das condicións laborais das coidadoras.