O comercio de Viveiro recibe o Premio Comercio Galego 2025 pola súa labor de dinamización
A Asociación Centro Comercial Casco Histórico de Viveiro foi galardoada cun dos principais recoñecementos do sector comercial en Galicia. A entidade recibiu o Premio Comercio Galego 2025 na categoría de Dinamización Comercial, un distintivo que recoñece as iniciativas máis destacadas de promoción, modernización e impulso do comercio de proximidade en toda a comunidade.
A xerente da asociación, Isabel Méndez, amosou a súa satisfacción e emoción tras recibir o premio: "É un orgullo enorme, non o esperabamos. Este recoñecemento simboliza todos estes anos de loita e traballo por sacar adiante o comercio de Viveiro como o corazón da Mariña", afirmou.
O acto de entrega celebrouse nun evento presidido polo conselleiro de Emprego, Comercio e Emigración, José González, acompañado pola delegada territorial da Xunta na Coruña, Belén do Campo, e o director xeral de Comercio e Consumo, Gabriel Alén. Durante a cerimonia, presentouse tamén a nova imaxe institucional do Comercio Galego, un selo que busca reforzar a identidade, a calidade e a excelencia do pequeno comercio no marco dunha campaña autonómica de promoción.