O Concello de Ourense pon en marcha o tren termal sen vehículos que garantan a saúde e seguridade do persoal de condución
Ourense, 19 de febreiro de 2025 – A sección sindical da CIG na concesionaria do servizo de transporte urbano do Concello de Ourense denuncia que o alcalde incumpriu o seu compromiso co cadro de persoal ao poñer en funcionamento o tren turístico das termas sen renovar os vehículos obsoletos. A central sindical asegura que o servizo comezou cos mesmos vehículos antigos, que non garantizan a saúde e seguridade tanto do persoal de condución como das persoas usuarias.
Desde a representación da CIG en Urbanos de Ourense lembran que o alcalde se comprometera en varias reunións a non poñer en marcha o servizo ata que se substituísen os vehículos, pero, segundo denuncian, o tren púxose en marcha cos mesmos, sen ningunha mellora en seguridade ou confort, tanto para os usuarios como para o persoal de condución.
Un dos principais problemas sinalados é que o posto de condución non cumpre coas necesidades do persoal. En concreto, o asento non é regulable en altura e carece dun sistema de amortecemento. Ademais, o habitáculo é demasiado pequeno, o que provoca serios problemas posturais a condutores de maior estatura (maiores de 1,75 metros), que non poden ter unha visibilidade adecuada.
O sistema de amortecemento dos vagóns tamén está obsoleto, provocando que os usuarios se queixen frecuentemente dos botes e golpes durante o percorrido. A isto hai que engadir que os vehículos non pasan a ITV correspondente, o que resulta incomprensible tendo en conta o historial de problemas de seguridade nos últimos anos.
Por todo isto, a CIG considera "inaceptable" que se poña en marcha un servizo con tantas deficiencias e esixe que se corrixan de xeito inmediato para garantir a seguridade e benestar tanto do persoal de condución como das persoas usuarias do tren termal.