O executivo municipal dá luz verde á reurbanización do 'Barrio Verde de Pontepedriña' no marco do proxecto ‘Entre Sar e Sarela’
A Xunta de Goberno Local de Santiago aprobou esta semana o expediente de contratación das obras de reurbanización do Barrio Verde de Pontepedriña, un proxecto que aposta pola renaturalización da zona e a creación dun corredor ecolóxico urbano. Esta intervención, que forma parte do plan “Entre Sar e Sarela”, conta co apoio da Fundación Biodiversidade do Ministerio para a Transición Ecolóxica e o Reto Demográfico (MITECO) e suporá un investimento de 1.922.386,59 euros.
A alcaldesa de Santiago, Goretti Sanmartín, destacou o potencial desta iniciativa para transformar Pontepedriña nun espazo máis sostible e integrado na contorna natural, reducindo a pegada do tráfico rodado e aumentando as áreas verdes.
Un proxecto para transformar Pontepedriña
A actuación céntrase na área comprendida entre as rúas Escultor Camilo Otero, Praza Pintor Laxeiro e Rúa Amor Ruibal, unha zona que actualmente conta cunha alta porcentaxe de espazo público dedicado ao tráfico rodado. A intervención pretende aumentar as zonas verdes e mellorar a conectividade ecolóxica coa contorna do Parque Eugenio Granell, parte do Anel Verde exterior da cidade.
O procedemento de contratación lanzarase cun orzamento base de licitación de 1.922.386,59 euros, repartidos nunha base impoñible de 1.588.749,25 euros e un IVE do 21% por importe de 333.637,34 euros.
O proxecto 'Entre Sar e Sarela': unha aposta pola naturalización urbana
O proxecto ‘Entre Sar e Sarela’ está financiado ao 95 % pola Unión Europea e contempla un investimento total de 3.228.069,12 euros, distribuídos en 1.596.722,49 euros para o ano 2024 e 2.480.945,93 euros para o ano 2025. A duración estimada do programa é de 28 meses, finalizando o 31 de decembro de 2025.
Ademais da reurbanización do Barrio Verde de Pontepedriña, inclúe outras catro actuacións clave:
- Naturalización da lagoa do Auditorio de Galicia, restauración fluvial do Río Corgo e mellora ecolóxica, cun investimento de 816.494,25 euros (sen IVE).
- Consolidación do Anel Verde exterior.
- Restauración ambiental e creación dun laboratorio vivo-urbano agroecolóxico no Xardín Botánico.
- Recualificación e recuperación ambiental da área verde do barrio de Cornes, cun orzamento de 225.724,37 euros.
Con estas iniciativas, o Concello de Santiago busca potenciar a renaturalización dos espazos urbanos, mellorar a biodiversidade e crear novas zonas de lecer sostibles para a cidadanía.