O lobo podería deixar de estar protexido tras unha iniciativa aprobada no Senado
A portavoz do Partido Popular no Senado, Alicia García, destacou que o pleno do Senado aprobou as emendas do PP á lei de desperdicio alimentario para sacar ao lobo da Listaxe de Especies Silvestres en Réxime de Protección Especial e Catálogo Español de Especies Ameazadas.
E fíxoo co apoio doutros grupos parlamentarios entre os que se atopa o PNV e Junts. Por tanto, de manter a mesma coherencia de voto no Congreso, estas emendas serían incluídas definitivamente na lei.
Algo que se producirá a próxima semana no pleno do Congreso, xa que na súa reunión de onte a Mesa da Cámara Baixa incluíu na orde do día da próxima semana a votación das emendas á lei de desperdicio alimentario.
Unha vez votadas as emendas do Senado no Congreso, a lei apróbase definitivamente e o Goberno publícaa no BOE e as Cortes no Boletín Oficial das Cortes.
Desta maneira, se os grupos que apoiaron estas emendas no Senado fano no Congreso, o lobo sairía do LESPRE en pouco máis dunha semana.
Así, o PP no Senado dá un paso de xigante para alcanzar a saída do lobo da listaxe LESPRE, tan ansiada polos nosos gandeiros.
“Despois de case catro anos de moitas iniciativas e reivindicacións desde todas as Administracións e afectados, estamos moi preto de lograr o obxectivo de salvar ao noso sector primario do lobo”, subliña Alicia García
“Este é o maior exemplo da debilidade do Goberno de Sánchez e de quen marca a axenda lexislativa en España. Non só impulsamos as solucións que España necesita, senón que empezamos a derrogar todo o dano causado polo sanchismo”, conclúe a portavoz popular.