O Museo Provincial de Lugo acolle obras do Reina Sofía nunha exposición temporal
O Museo Provincial de Lugo inaugurou unha exposición de obras convidadas procedentes do Museo Nacional Centro de Arte Reina Sofía, que permanecerá aberta ata o 30 de marzo.
Entre as pezas destacadas están as pinturas Jesús, Marta e María de Julia Minguillón, Humos helados / Paisaje abstracto de Benjamín Palencia e unha obra de Victoria Malinowska. Trátase dunha oportunidade única para ver estas obras en Lugo por primeira vez.
A mostra, coordinada pola dirección e o departamento de Belas Artes do museo, insírese na colaboración institucional entre ambos centros e coincide co préstamo de cinco pinturas de Maruja Mallo que o Museo Provincial enviou ao Reina Sofía para a retrospectiva “Maruja Mallo. Máscara e compás”, que se inaugurará o 7 de outubro en Madrid.
As obras seleccionáronse en función do contexto cronolóxico-cultural das pinturas de Maruja Mallo. Así, Julia Minguillón, artista galega e coetánea de Mallo, está representada cunha pintura de 1934 que obtivo a terceira medalla na Exposición Nacional de Belas Artes. Benjamín Palencia figura na mostra pola súa vinculación coas vangardas e o surrealismo, mentres que Victoria Malinowska aporta a perspectiva dunha pintora de orixe rusa integrada no círculo artístico madrileño das primeiras décadas do século XX.
A exposición permite contextualizar a Maruja Mallo dentro da arte do primeiro terzo do século XX e reforza a colaboración museística entre o Museo Provincial de Lugo e o Reina Sofía.