O persoal das residencias segue en pé de guerra: “Non somos escravas, somos traballadoras!”
Pontevedra, 28 de febreiro de 2025. O persoal das residencias privadas da terceira idade continúa a súa loita por unhas condicións laborais dignas. Esta tarde, unha nova manifestación convocada por CIG-Servizos percorreu as rúas de Pontevedra baixo o lema "Non somos escravas, somos traballadoras!", reclamando melloras reais no convenio colectivo do sector.
A marcha saíu ás 18:30 horas da residencia DomusVi, na rúa Loureiro Crespo, e concluíu na residencia Saraiva, na rúa Don Gonzalo, onde se deu lectura a un manifesto coas principais reivindicacións do persoal. Ademais, anunciouse unha asemblea nacional de delegadas e delegados do sector, que terá lugar o vindeiro 7 de marzo no edificio Cersia de Santiago ás 10:30 horas, co obxectivo de definir as seguintes accións para mellorar as condicións laborais.
A principal demanda do colectivo é un convenio colectivo digno, despois de que na última reunión da mesa negociadora, en outubro, a patronal presentara unha proposta que deixaba o persoal sen complemento en caso de baixa, non incluía redución da xornada, nin melloras sociais, e establecía salarios por debaixo do SMI entre 2024 e 2027.
Precariedade laboral e responsabilidade institucional
Desde CIG-Servizos denuncian que esta proposta busca afondar na precariedade dun sector altamente feminizado, con salarios baixos, xornadas parciais, cargas de traballo excesivas e exposición a riscos laborais. "As patronais do sector buscan facer negocio a costa das traballadoras, coa conivencia de CCOO e UGT e a pasividade da Xunta do PP", sinalaron.
A central sindical critica tamén que o actual convenio, asinado por CCOO e UGT, provocou unha perda de poder adquisitivo do 7,8% para o persoal. Ademais, denuncia o modelo de atención imposto pola Xunta, onde case a metade das prazas privadas están financiadas con cartos públicos, beneficiando especialmente ás empresas DomusVi e Fundación San Rosendo, que reciben dúas de cada tres prazas concertadas.
Por este motivo, CIG-Servizos insta á Xunta a intervir de forma inmediata no sector e avanzar cara a un modelo público de coidados que garanta os dereitos das traballadoras e unha atención digna ás persoas usuarias.