O San Froilán 2025 ofrecerá preto de 200 actividades entre tradición e música de alto nivel
O programa do San Froilán 2025, que se celebrará do 4 ao 12 de outubro en Lugo, combina tradición, cultura e música de primeiro nivel, cun total de preto de 200 actividades pensadas para todos os públicos.
Entre elas, máis de 100 serán concertos nos que participarán tanto artistas recoñecidos a nivel galego e internacional como máis de 50 agrupacións locais. Destacan actuacións de Tanxugueiras, Xoel López, Cristina Branco, Guadi Galego, Uxía, El Consorcio, Dakidarría, Pony Pisador, Queralt Lahoz, Lucía Pérez ou Lía Kali, entre outros, ofrecendo un escaparate para a música feita en Lugo xunto a referentes nacionais e internacionais.
A programación mantén un firme compromiso coa tradición galega, incluíndo o Desfile do Gando, o XXII Festival de Cultura Tradicional de Cántigas e Frores, a XXVII Mostra de Música Tradicional Galega do Domingo das Mozas e a 53ª edición do Desfile do Traxe Galego. Para os máis pequenos, o San Froilán Miúdo contará con espectáculos de circo, maxia, xogos e obradoiros nas rúas da cidade e na carpa do Seminario, con compañías como Paporrubio, La Finestra, Troula, Teatro ao Cubo ou Ghazafelhos.
O programa complétase con Expolugo, que exhibirá razas autóctonas galegas, feiras artesás, de mel, de olería e antigüidades, actividades deportivas e verbenas que percorrerán a cidade. Segundo a concelleira de Cultura, Turismo e Promoción da Lingua, Maite Ferreiro, “o San Froilán é a festa máis importante do outono galego, unha celebración aberta, diversa e participativa que mestura tradición e modernidade e sitúa Lugo como epicentro cultural de Galicia”.
CONSULTA TODA A PROGRAMACIÓN DO SAN FROILÁN 2025
CONSULTA TODA A PROGRAMACIÓN DO SAN FROILÁN MIÚDO 2025