Rural

Estas protestas dan continuidade ás mobilizacións desenvolvidas entre o 12 e o 21 de xaneiro

Os gandeiros e gandeiras da provincia de Lugo volveron este xoves ás rúas da capital nunha nova xornada de mobilizacións contra o acordo comercial entre a Unión Europea e Mercosur, tras unha semana de parón nas protestas ante a falta de avances. As concentracións foron convocadas de novo polas organizacións Agromuralla e Gandeiros Galegos da Suprema.

Centos de profesionais do sector concentráronse nas inmediacións da sede da Xunta en Lugo e iniciaron unha manifestación que percorreu o traxecto ata a Subdelegación do Goberno. Como xa ocorrera en xornadas anteriores, a mobilización estivo acompañada por máis dun cento de tractores, que circularon polas rúas da cidade e provocaron retencións de tráfico nas vías próximas ao percorrido. Os vehículos agrícolas permaneceron ao longo do día ocupando un dos carrís da Ronda da Muralla, coa previsión de retiralos pola noite.

O regreso das protestas prodúcese malia que o Parlamento Europeo aprobara recentemente, por unha axustada maioría, levar o acordo UE-Mercosur ante o Tribunal de Xustiza da Unión Europea, ao existir dúbidas sobre a súa compatibilidade co dereito comunitario. A decisión fora recibida con satisfacción polos manifestantes, que daquela optaran por suspender temporalmente as mobilizacións. Porén, segundo explican os convocantes, a ausencia de avances reais e de respostas institucionais obrigounos a retomar a presión na rúa.

Os representantes do sector denuncian que seguen sen obter resposta ás reunións solicitadas co delegado do Goberno, a subdelegada e os eurodeputados, e aseguran que a indignación é xeralizada entre os produtores de todo o Estado. Critican, ademais, que o apoio político recibido sexa ambiguo e condicionado a intereses alleos ao campo, mentres se mantén o respaldo ao tratado comercial.

Estas protestas dan continuidade ás mobilizacións desenvolvidas entre o 12 e o 21 de xaneiro, cando preto de 180 tractores participaron durante dez días consecutivos en concentracións, marchas a pé e accións reivindicativas que provocaron importantes problemas de tráfico na cidade.

Á manifestación sumáronse tamén representantes do BNG. As deputadas Montse Valcárcel e Nino Fernández acompañaron ao sector, ao considerar que o acordo con Mercosur é “gravemente prexudicial para o sector primario galego e para a economía produtiva do país”. Fernández cualificou o tratado como un novo golpe ao campo galego, nun contexto marcado polo incremento dos custos, os recortes na PAC e a falta de protección ás pequenas e medianas explotacións. Tamén sinalou a responsabilidade compartida de PSOE e PP, acusándoos de apoiar o acordo nas institucións mentres se presentan como defensores do rural.

A mobilización coincidiu coa presentación dunha moción do BNG no pleno do Concello de Lugo en rexeitamento do tratado, que non saíu adiante tras o voto en contra do PSOE e a abstención do PP, unha decisión que os nacionalistas cualificaron de nova mostra de abandono dos intereses do sector agrogandeiro galego.