Pablo Crespo despide o Mundial cun ouro no C-2 500 sub-23 xunto a Daniel Grijalba
O padexeiro pontevedrés Pablo Crespo pechou cunha medalla de ouro a súa participación no Campionato do Mundo de piragüismo júnior e sub-23, que se celebrou esta semana na localidade portuguesa de Montemor-o-Velho. Crespo, olímpico do Escuela de Piragüismo Ciudad de Pontevedra, proclamouse campión do mundo na proba de C-2 500 metros sub-23 xunto a Daniel Grijalba, cun tempo de 1:43.31.
A dupla española foi a máis rápida da final, superando con solvencia á parella brasileira formada por Gabriel Nascimento e Mateus Santos, que cruzaron a meta a máis de dous segundos e medio. A medalla de bronce foi para o equipo ucraíno, nunha final moi disputada cos representantes de Bielorrusia e Rusia.
Este ouro supón o segundo metal para Pablo Crespo nesta cita mundialista e o primeiro ouro da delegación galega en augas lusas.
Ademais, outros e outras padexeiras das Rías Baixas estiveron presentes nas finais deste domingo. Marta Castiñeiras e Silvia Gago, despois do bronce acadado por Castiñeiras no C-2 júnior 200 metros xunto a Lara Remigio, competiron no C-4 xunto a Marta Candón e Aitana Montilla, rematando novenas cun tempo de 2:06.18. O ouro foi para Canadá (1:56.98).
Tamén competiron no C-4 500 sub-23 Valeria Oliveira (Piragüismo Poio Pescamar) e Claudia Couto (Ciudad de Pontevedra), acompañadas de Elena Gómez Millán e Ana Cantero. O seu tempo, 2:02.80, non foi suficiente para loitar polo podio, dominado por Bielorrusia.
En total, a representación pontevedresa regresará do Mundial con seis medallas: un ouro, tres pratas e dous bronces. Unha mostra da potencia e regularidade das Rías Baixas como viveiro de talentos do piragüismo internacional.