Picusa Academy fará historia ao participar no 'Tour de Francia' júnior como primeiro equipo galego convidado
O proxecto ciclista de Picusa Academy fará historia esta semana ao estrearse no Ain Bugey Valromey Tour, coñecido como o ‘Tour de Francia’ da categoría júnior, converténdose así no primeiro equipo galego en competir nesta prestixiosa volta por etapas. A súa 21ª edición desenvolverase do 11 ao 15 de xullo na rexión francesa de Auvernia-Ródano-Alpes e contará con cinco etapas e 29 escuadras convidadas, entre elas só dúas españolas: Picusa Academy e MMR Academy de Asturias.
A proba, organizada coa colaboración de ASO (organizadora do Tour de Francia profesional), reúne a equipos de todo o mundo, incluídos filiais de estruturas World Tour como Decathlon AG2R, EF Education ou Groupama-FDJ. No seu palmarés figuran nomes como Mathieu Van der Poel ou Romain Grégoire.
A organización valorou especialmente o proxecto galego e os seus resultados recentes, como o primeiro posto na clasificación por equipos da Copa de España 2023 ou os 14 triunfos individuais nesta tempada.
A formación que dirixe Djamel Avendaño presentarase co seguinte equipo: Enrique Maranchón, Diego López, Omer Ramon, José Salgueiro, Carter Barnes e Dimas Mota.
O mesmo día do inicio da volta francesa, Picusa Academy tamén competirá en Portugal, no Grande Prémio do Minho, con Rodrigo García, Xián Alvariño, Hugo Muñoz, Nicolás Almada, Daniel Vieito e Ryan O’Shaughnessy.