Pontón denuncia que Rueda practica pola vía dos feitos un negacionismo climático favorable a Altri e letal para Galiza
A portavoz nacional do BNG, Ana Pontón, acusou ao presidente da Xunta, Alfonso Rueda, de traizoar a Galiza ao pretender impoñer a "bomba ambiental" de Altri e practicar, pola vía dos feitos, un negacionismo do cambio climático que favorece os intereses da multinacional portuguesa e resulta letal para o país.
“Estamos ante un goberno do Partido Popular que, pola vía dos feitos, é negacionista do cambio climático, que abraza as teses trumpistas de que a preservación do medio ambiente, da biodiversidade e o coidado do planeta é woke”, criticou desde A Pobra do Caramiñal. Engadiu que este "negacionismo ambiental de Rueda é beneficioso para Altri, pero será un auténtico despropósito e letal" para o rural e o mar galego.
Así o indicou no acto de apoio do BNG á mobilización convocada para este próximo sábado na Pobra contra a instalación da macrocelulosa en Galiza. Acompañada pola tenente de alcalde da localidade, Amparo Cerecedo, así como por representantes municipais e comarcais e as deputadas Rosana Pérez e Montserrat Prado, Pontón fixo un chamamento a unha mobilización histórica.
“Esta manifestación vai ser unha marea de dignidade, a unión de todas as persoas que lle queremos a Galiza. Será un elemento clave para parar a bomba ambiental que o Partido Popular quere colocar no corazón do noso país”, afirmou, alertando do risco que supón para miles de postos de traballo, o medio ambiente e o tecido produtivo do rural e do mar.
A líder do BNG advertiu de que a macrocelulosa portuguesa afectará gravemente a produtividade da ría de Arousa, debido aos 30.000 metros cúbicos de residuos contaminantes que vertería ao río Ulla, que desemboca na ría, así como a súa solicitude de concesión de augas por 75 anos para captar 46.000 metros cúbicos de auga ao día, o equivalente ao consumo diario de máis de 350.000 persoas.
“Se a macrocelulosa é tan boa, por que non a queren en Portugal? Esa é a pregunta que, a día de hoxe, Rueda aínda non respondeu”, cuestionou Pontón.
Por iso, e fronte a esta traizón do PP, Pontón apelou á dignidade e á mobilización cidadá. "Somos a maioría e imos parar Altri", concluíu.
Manifestación contra Altri
Día: Sábado, 23 de marzo
Hora: 12:00 h
Lugar: A Pobra do Caramiñal