Publicadas as axudas da Deputación de Pontevedra para clubs deportivos de competición local
A Deputación de Pontevedra acaba de publicar no Boletín Oficial da Provincia as bases das axudas para clubs deportivos que participan en competicións oficiais de ámbito inferior ao estatal. Esta liña de subvencións conta cun orzamento total de 650.000 euros, que se repartirán en réxime de concorrencia competitiva. Os clubs poderán presentar as súas solicitudes a partir do vindeiro luns 21 de abril, durante un prazo de 20 días hábiles.
No ano pasado, estas axudas beneficiaron a 519 clubs de 58 concellos da provincia. A convocatoria distribúese en dúas liñas diferenciadas. A primeira, cun orzamento de 600.000 euros, está destinada aos clubs que participen en competicións de ámbito inferior ao estatal e poderán optar a un máximo de 3.000 euros por entidade. A segunda, dotada con 50.000 euros, diríxese especificamente a clubs que compiten na categoría Preferente Galicia de fútbol, cun máximo de 5.000 euros por club.
En ambos casos, o importe máximo concedido non poderá superar o 80% do orzamento presentado. Os gastos subvencionables inclúen os federativos, de competición, adestramento, persoal, material deportivo e gastos sanitarios. As bases completas e os requisitos específicos poden consultarse no Boletín Oficial da Provincia de Pontevedra (BOPPO).