Rueda reivindica o compromiso dos concellos galegos coa sustentabilidade na entrega das Banderas Verdes 2025
O presidente da Xunta, Alfonso Rueda, acompañado pola conselleira de Medio Ambiente e Cambio Climático, Ángeles Vázquez, participou hoxe en Mos na entrega das Banderas Verdes de Galicia, un acto que destacou como exemplo do compromiso dos concellos e da súa veciñanza coa sustentabilidade.
“Este é un acto de amor pola nosa terra, no que enviamos unha mensaxe de que non só os responsables municipais senón tamén o conxunto dos veciños están comprometidos con ter un concello fermoso e sostible, concienciados con esa mentalidade verde de Galicia fermosa, Galicia bonita, esa Galicia Calidade”, afirmou.
A Bandeira Verde de Galicia, creada pola Xunta no ano 2020, consolidouse como un distintivo pioneiro a nivel estatal. Galicia foi a primeira comunidade autónoma en contar cun selo propio que distingue o esforzo local polo coidado da paisaxe, a eficiencia enerxética, a educación ambiental e a xestión responsable dos recursos.
Nesta sexta edición acadouse unha cifra récord, con 33 concellos recoñecidos, case un 40% máis ca o ano pasado. A Coruña é a provincia con máis municipios galardoados (15 en total), mentres que Lugo, Ourense e Pontevedra contan con seis localidades recoñecidas cada unha.
Para o presidente, esta distribución mostra que a Bandeira Verde é unha ferramenta que impulsa a cohesión territorial, xa que permite que concellos do interior e do rural teñan as mesmas oportunidades de visibilidade que os costeiros.
Rueda destacou tamén o papel de Mos, que este ano se incorpora á lista de concellos distinguidos. O municipio foi recoñecido pola presentación de once iniciativas sostibles, entre elas o Plan de Acción polo Clima e a Enerxía Sostible, proxectos de mobilidade activa, medidas de eficiencia enerxética, xestión responsable da auga e programas de educación ambiental.
Durante o acto, o presidente avanzou que en 2026 a Xunta creará a Rede de Concellos Bandeira Verde de Galicia, unha estrutura de cooperación que permitirá compartir boas prácticas, desenvolver proxectos conxuntos e ofrecer apoio técnico e económico aos municipios adheridos.
A rede contará cun foro anual de expertos e cunha páxina web de referencia, co obxectivo de reforzar o posicionamento de Galicia en Europa como territorio comprometido coa paisaxe e a sustentabilidade.
Rueda enmarcou esta iniciativa na nova Estratexia Galega da Paisaxe Horizonte 2030, que está a elaborar o Instituto de Estudos do Territorio, dependente da Consellería de Medio Ambiente e Cambio Climático. Esta folla de ruta integrará a protección da paisaxe en ámbitos como a ordenación do territorio, a mobilidade, o turismo e a educación, co propósito de facer do paisaxe un eixe transversal do desenvolvemento sostible e da identidade galega.
O presidente destacou que o obxectivo da Xunta é que “a conservación da paisaxe, que é tanto como dicir a conservación de Galicia e dos seus concellos, estea presente en todas as políticas transversais”.