Santiago afianza o seu liderado turístico en Galicia con máis estadías e maior tarifa media
Santiago de Compostela consolídase como o principal destino turístico de Galicia, segundo os datos publicados polo Instituto Nacional de Estatística (INE) correspondentes ao primeiro semestre de 2025. A capital galega contabilizou un total de 696.085 estadías nos primeiros seis meses do ano, superando tanto a A Coruña (479.519) como a Vigo (372.190).
Do total rexistrado, 365.132 estadías foron internacionais, unha cifra moi similar á do mesmo período de 2024, destacando os meses de maio e xuño, nos que se superaron as 100.000 estadías foráneas en cada mes. Esta tendencia de turismo internacional contribúe tamén a un aumento da tarifa media, o que repercute positivamente na economía local.
Segundo informou a concelleira de Turismo, Míriam Louzao, “a evolución turística neste 2025 continúa sendo positiva”, lembrando que “xa o ano pasado fora o ano con maior número de estadías na cidade”. Subliñou que este crecemento está en liña co modelo turístico polo que aposta o Concello, baseado en visitantes que pernoctan, consomen e deixan valor engadido.
En canto á tarifa media, en xuño foi de 108,13 euros, un incremento do 8 % respecto ao mesmo mes do ano anterior. Por comparación, a tarifa media foi de 79,94 € en A Coruña e de 77,63 € en Vigo.