Sanxenxo acolle un concerto de ópera do Son Verán en homenaxe a Caballé e Pavarotti
A Deputación de Pontevedra leva este xoves 28 de agosto o programa Son Verán a Sanxenxo cun concerto de ópera en homenaxe a Montserrat Caballé e Luciano Pavarotti. A cita será ás 21:30 horas na Praza Fonte de Ramos, da man de OperaConcert, e enmárcase neste ciclo provincial que reúne espectáculos de alta calidade artística en enclaves patrimoniais e paisaxísticos.
O recital contará coa presenza de Montserrat Martí Caballé, filla da recoñecida soprano, e Simona Todaro, neta de Pavarotti, acompañadas pola soprano galega Loli Crespo, o barítono Luis Santana e o pianista Víctor Carbajo. O programa incluirá arias e cancións como O mio babbino caro, Ave María, O sole mio ou Nessun dorma, ademais de canción española e zarzuela. Durante a velada tamén se compartirán lembranzas e anécdotas persoais das dúas figuras homenaxeadas.
Son Verán é unha nova iniciativa da Deputación de Pontevedra que inclúe 13 concertos entre agosto e outubro en diferentes concellos da provincia. Ademais deste recital, o cartel inclúe artistas como Carlos Núñez, Óscar Ibáñez, Emilio Rúa ou o dúo formado por Teo Cardalda e María Monsonís. O ciclo chegará proximamente a Forcarei, Mondariz, Moraña, Poio, Ponteareas e Vilanova de Arousa, consolidando unha aposta pola descentralización cultural e a música de primeiro nivel en todo o territorio provincial.