Deportes

Os bikers impuxéronse nun circuíto esixente marcado pola lama en Muros. Nos títulos por parellas, os máis rápidos foron Rebeca Fontela-Samuel González, María Filgueiras-Irene Trabazo e Manuel Armada-Darío Buceta.

A especialidade invernal do BTT en Galicia renovou a súa nómina de campioas e campións este domingo en Muros. O circuíto deseñado nas inmediacións do campo de fútbol Agra da Filgueira de Louro acolleu a cuarta edición do Campionato de Galicia 3h Resistencia, un evento que contou con 261 inscritos. Os grandes favoritos, a elite Tamara Seijas (RG Bikes) e o máster-30 Samuel Baña (Xesteiras), fixeron valer os prognósticos e impuxéronse nas súas categorías con autoridade.

As condicións climatolóxicas e a lama complicaron a proba, aumentando a esixencia dun trazado coidado ao detalle polo Club Ciclista Muros. A carreira masculina viviu un emocionante man a man entre Samuel Baña e o sub-23 Adrián Caamaño (Extol-Zambora.es), que rodaron xuntos ata a última volta. Finalmente, Baña abriu unha diferenza de 32 segundos e logrou a vitoria absoluta por primeira vez no Campionato de Galicia 3h Resistencia, impoñéndose ademais no seu concello.

Na categoría feminina, Tamara Seijas tivo que remontar para impoñerse á defensora do título elite, Raquel Román (Bici Verde). Tras un inicio dominado por Román, Seijas deu a volta á clasificación nos últimos parciais, cruzando a meta cunha vantaxe de 4 minutos e 21 segundos.

No apartado de parellas, os títulos absolutos foron para Manuel Armada e Darío Buceta (Cidade de Santiago-Supermercados Froiz) na categoría masculina, Rebeca Fontela e Samuel González (Máis Que Bicis) na mixta e Irene Trabazo e María Filgueiras (XSM) na feminina. Ademais, por primeira vez, a carreira de parellas cadetes, con dúas horas de duración, concedeu títulos autonómicos, que recaeron en Andrea Paz e Aroa Ferreño (Esmelle), Iris Santana e Lucas Carrizo (Coruxo) e Mateo Ledo e José Manuel Pintos (Lynalfa-Ponteareas).