Un incendio forestal no polígono do Ceao mobiliza aos bombeiros de Lugo
Un incendio forestal rexistrado arredor das 17.00 horas deste sábado, 16 de agosto, nas inmediacións do polígono industrial do Ceao, en Lugo, obrigou a mobilizar efectivos do servizo de bombeiros da cidade.
Ao lugar desprazáronse dúas unidades con camións de extinción para controlar as lapas e evitar que se propagasen a zonas próximas de actividade empresarial.
Segundo as primeiras informacións, a orixe do lume estaría nun coche estacionado que ardeu por causas aínda descoñecidas. As autoridades confirmaron que se abrirá unha investigación para esclarecer o sucedido.
O incendio afectou a unha superficie duns 500 metros cadrados, pero non chegou a danar ningunha das naves industriais da contorna nin provocou perdas materiais nin persoais.
Entre as persoas presentes atopábase o tenente de alcalde de Lugo, Rubén Arroxo, que se achegou á zona para colaborar co dispositivo e interesarse polo operativo. Segundo confirmou o propio Arroxo, o lume xa foi totalmente sufocado e a situación permanece baixo control, quedando descartado calquera risco para as empresas próximas.