Voluntarios retiran 10,5 toneladas de lixo mariño na Illa de Arousa dentro do plan PLANCTON
Máis de 120 voluntarios sumáronse este venres a unha gran xornada de limpeza nos areais de Semuíña e Abilleira, na Illa de Arousa, dentro do programa de conservación territorial PLANCTON, promovido por Afundación, a Obra Social de ABANCA.
Durante a xornada, os participantes lograron retirar 10,5 toneladas de residuos mariños, entre os que destacaban máis de 20 pneumáticos utilizados como defensas en embarcacións pesqueiras, ademais de grandes redes, cabos e cordas de bateas arrastradas ata a costa polos temporais do inverno.
Os residuos recollidos foron trasladados por un xestor autorizado, encargado do seu correcto tratamento.
Un traballo de limpeza complexo e necesario
A actividade, que concluíu co pesado final no porto de Xufre, evidenciou a dificultade de retirar este tipo de residuos, especialmente os pneumáticos, que, unha vez extraviados, énchense de lodo e quedan semi-enterrados na area.
Nesta xornada participaron alumnado e profesorado do IGAFA, así como mariscadoras e pescadores da Confraría de San Xulián da Illa de Arousa, que colaboraron na extracción dos residuos.
Esta acción é a terceira intervención de limpeza de PLANCTON no que vai de ano, tras a levada a cabo o pasado martes na praia do Orzán (A Coruña) con voluntariado do terceiro sector, e a realizada a finais de xaneiro en Baldaio (Carballo) por estudantes e profesores do Centro de Formación Profesional Afundación da Coruña.
Compromiso coa conservación mariña e a sustentabilidade
O proxecto PLANCTON, impulsado por Afundación no marco da estratexia de sustentabilidade de ABANCA, ten como obxectivo concienciar á sociedade sobre a importancia de conservar os recursos mariños e fomentar prácticas sostibles no sector pesqueiro e recreativo.
Esta iniciativa enmárcase nos Obxectivos de Desenvolvemento Sostible (ODS), especialmente en:
- ODS 13: Acción polo clima
- ODS 14: Vida submarina
- ODS 17: Alianzas para lograr os obxectivos
Dende o seu lanzamento, máis de 80 entidades colaboraron con PLANCTON, incluíndo administracións públicas, centros educativos, empresas, centros de investigación, clubes deportivos e ONG medioambientais.