O Concello de Paradela vén de poñer en marcha un proceso para a recollida de información sobre os hábitos de mobilidade dos veciños e veciñas do municipio, dentro da redacción do seu Plan de Mobilidade Sostible. Para tal fin, o goberno local subiu á páxina oficial do Concello un cuestionario que servirá para analizar esas condutas, pero tamén para recibir propostas e demandas.
A enquisa estará aberta ata o vindeiro 28 de febreiro, un prazo no que as persoas interesadas poderán tamén facer chegar as súas suxerencias a través do correo paradela@plandemobilidade.com.
O Concello e o equipo de técnicos que colaboran na redacción do Plan de Mobilidade garanten o absoluto anonimato da identidade das persoas que participen neste estudo. Unha vez obtidos, os resultados publicaranse na páxina oficial do Concello.
