Un ciclo de proxeccións audiovisuais levará os filmes finalistas ao Premio Mestre Mateo a Foz, Vilalba e Chantada. As tres localidades acollerán nas vindeiras semanas os pases de Ons, de Alfonso Zarauza; A illa das mentiras, de Paula Cons; Arima, de Jaione Camborda, e Lúa Vermella, de Lois Patiño, candidatas ao galardón na categoría de Mellor Longametraxe.
Esta iniciativa levouse a cabo entre a Deputación provincial, a Academia Galega do Audiovisual, o Iescha, e Airoá Comunicación, que xestionarán as proxeccións en Vilalba e Chantada, respectivamente.
O ciclo de proxeccións arranca a vindeira semana en Foz con pases, do 6 ao 9 de abril, ás 20.00 horas na Casa da Cultura.
- 6 de abril – Lúa Vermella
- 7 de abril – Arima
- 8 de abril – A illa das mentiras
- 9 de abril – Ons
A entrada será gratuíta pero con reserva previa, para cumprir coas limitacións de capacidade e garantías sanitarias. As persoas que queiran asistir teñen que anotarse a través do teléfono 982133037.
Nos vindeiros días concretaranse as proxeccións en Vilalba e Chantada, prevista para o mes de maio.
