A ORGACCMM e Ecoloxistas en Acción denuncian que o Partido Popular presentou enmendas á súa propia lei de “Recuperación de terras agrarias” para que a “Moratoria do eucalipto” anunciada polo Goberno galego e incluida nesta lei quede nun mero anuncio sen capacidade de revertir a situación.
Ambas organizacións sinalan que a Xunta de Galicia anuncio a “Moratoria do eucalipto” como unha medida eficaz para a plaga do eucalipto que asola os montes galegos. Semellaba que o Goberno galego por fin asumía o alcance do problema económico e ambiental da propagación do eucalipto e en consecuencia promovía medidas correctoras, pero, sinalan, o sesgo das enmendas do Partido Popular o seu propio borrador de lei deixan claro que os seus propósitos difieren do anunciado coa “Moratoria do eucalipto”.
Ecoloxistas en Acción e a Organización galega de comunidades de montes sinalan que de aprobarse as enmendas presentadas polo Partido Popular ao seu propio borrador da lei de Recuperación de terras agrarias poderanse seguir repoboando con eucalipto aqueles montes que no seu plan de ordenación contemplen este tipo de plantacións ou naqueles montes que no momento de entrar en vigor a moratoria estén tramitando o plan de ordenación. Denuncian que así o que fai a moratoria e garantirlles ás empresas a superficie de eucalipto que hoxe teñen. Sen importar se estas plantacións están en terras agrarias ou en zonas con protección ambiental.
“Estas enmendas converten a moratoria nun burdo engano, xa que permitirían que naqueles montes onde o eucalipto supere o 50% da masa forestal sexa plantada toda a supercie por esta especie invasora eliminando as restantes” -alerta Catalina Coya voceira de Ecoloxistas en Acción- “Así esta moratoria do Partido Popular non vai reducir o número de hectáreas de eucalipto, senon que permitirá que aumente”.
Denuncian, ademais, a trampa que sería permitir que naqueles montes onde a plantación dominante é o eucalipto se poda trasladar a outra superficie do mesmo monte a masa de eucalipto substituida por outra especie. Deste xeito se os titulares do monte queren plantar outras especies poden plantar a mesa superficie do eucaliptos eliminado en outra superficie do monte. Advirten que así a moratoria non elimina superficie de plantación de eucalipto, só os cambia de lugar.
“Cousa distinta sería se parello ao cumplimento da moratoria a Consellería do Medio Rural realizara unha ordenación das plantacións de eucalipto que contemplara entre outras cousas a retiradas desta especie nas zonas agrícolas, agrarias ou de proteción ambiental” -declara Jose Pereira, presidente da Organización galega de comunidades de montes- “Esta ordenación da plantación de eucalipto tería que entrar en vigor no mesmo momento no que rematase a moratoria e ademais debería, nas zonas susceptible de plantación de eucalipto, ir destinando superficie para producir madeira de calidade”.
PSOE
Pola súa banda, o portavoz de Política Forestal do Grupo Socialista, Martín Seco, presentou unha serie de iniciativas parlamentarias para esixirlle á Xunta que tome medidas urxentes para frear a plantación masiva de eucalipto provocada polo seu anuncio da suspensión de novas plantacións desta especie que non se sabe cando vai comezar. Seco alertou de que o anuncio “incide no mercado dun xeito irresponsable”.
O responsable socialista alerta de que o anuncio da suspensión “alí onde non se plante a dita especie no momento da suspensión” provocou que os viveiros esgotaran as plantas de eucalipto e as talas de pino e outras especies para plantar eucalipto antes de que estea prohibido, tirando polo chan os prezos do piñeiro.
Sinala que “nun momento de crise como o actual, a Dirección Xeral de Planificación e Ordenación Forestal debe tomar medidas para non seguir incidindo negativamente nos intereses dos propietarios no mercado da madeira e non se leve a cabo unha plantación masiva de eucalipto sen control neste período de espera”.
