A escritora vilalbesa Cecilia F. Santomé obtivo co seu relato As orfas daquel verán, o terceiro premio no Certame de Narracións Breves Manuel Murguía. Na mesma cerimonia, distinguiuse tamén de entre os setenta relatos admitidos a concurso a Gabriel Gómez, segundo premio por A caverna de Lara, e a Arantza Portabales, primeiro por Xanelas.
O xurado, constituído por Álex Mene Pazos, terceiro premio na anterior edición, Beatriz Maceda Abeleira, escritora representante da Asociación de Escritoras e Escritores en Lingua Galega, Inma Otero Varela, crítica representante da Asociación Galega da Crítica, e Alfredo Ferreiro Salgueiro, director literario do Certame, que asistiu en calidade de secretario, con voz e sen voto, destacou a representación que Fernández Santomé fai no seu relato da Galicia dos anos 80, así como da vida emigrante daquel tempo. Tamén gabou a súa aposta polas voces femininas e a incorporación ao texto de referencias literarias contemporáneas.
A entrega dos premios, convocados pola Concellaría de Cultura do Concello de Arteixo e que este ano celebraban o seu trinta aniversario, tivo lugar o venres, 14 de maio, no Centro Cívico Cultural da vila coruñesa. Xurxo Souto foi o mantedor do acto, no que se homenaxeou ademais a distintos persoeiros locais vinculados coa historia do certame e a vida cultural de Arteixo. Antes, inaugurouse o Paseo das Letras, que lembrará os nomes dos gañadores en cada convocatoria, e plantouse unha árbore.
O Certame de Narracións Breves Manuel Murguía é un dos recoñecementos senlleiros do sistema literario galego. No seu palmarés, figuran nomes como Teresa Moure, Juan Tallón, Antón Riveiro Coello, Inma López Silva ou Samuel Solleiro.
