Guitiriz ten na XLIII Semana de Cine de Lugo unha sección na que estarán dous dos traballos audiovisuais máis recentes sobre este concello.
Entrar aos vilares, o filme documental dirixido por Cibrán Tenreiro e que pertence ao proxecto Lareira de soños e o documental Cine Tomé, unha raiolada en Guitiriz, creado por Kamy Iglesias e Xosé Antonio Arias, proxectaranse o vindeiro xoves 23 de setembro ás 20:00 no salón de actos da Deputación Provincial dentro da XLIII Semana de Cine de Lugo nunha sección do prestixioso certame adicada a Guitiriz.
Ambas películas foron promovidas dende entidades culturais do concello, a primeira dende a asociación dos Vilares e a do Cine Tomé dende a AC Xermolos e as dúas tentan recuperar anacos da historia recente, a primeira dende unha perspectiva etnográfica (Entrar aos Vilares) e a outra dende a lembranza viva dun pasado aínda presente (Cine Tomé).
Entrar aos Vilares proxectouse en máis de setenta lugares de Galícia e foi finalista na MICE Mostra Internacional de Cinema Etnográfico e está editada en DVD co libro Lareira de soños de Pastora Veres. Cine Tomé, unha raiolada en Guitiriz estreouse no XLI Festival de Pardinhas o pasado ano.
Os dous filmes fan protagonistas ás xentes do lugar como narradores da súas propias vivencias, construtores e constructoras da historia dun pobo.
Guitiriz terá o vindeiro xoves protagonismo na Semana de Cine de Lugo amosando dous traballos audiovisuais producto do seu dinamismo asociativo e cultural.
