Patricia Otero denuncia que “logo das declaracións de intencións e os eslógans do anterior Pleno, demostran que a Xunta non fixo, nin fai nin fará nada” para promover a instalación da factoría na Mariña.
A parlamentaria socialista Patricia Otero acusou ao PP e á Xunta de “darlle as costas á Mariña” ao rexeitar no Pleno do Parlamento unha moción que lle reclamaba á Xunta que promovera a instalación da nova planta de Altri na comarca. Otero acusa ao goberno galego de deixar o apoio á instalación da factoría en “declaracións de intencións e eslógans que logo non compren”.
Otero lamentou que o goberno galego confirmou que “a Xunta non fixo, nin fai, nin fará nada para promover a instalación de Altri na nosa comarca” logo de que no anterior Pleno incorporaran a un acordo parlamentario unha emenda socialista en apoio á chegada da fábrica. Advertiu que aquel acordo, “que foi ben recibido na comarca”, foi desmentido ao día seguinte, cando o propio conselleiro de Industria “non foi quen de pronunciar unha soa vez á Mariña”.
Acusou a Feijóo e ao conselleiro de Industria de “darlle a volta ao acordo parlamentario” evitando ratificalo ao día seguinte, cando “nin mu, no dixo nada” da comarca, e facendo caso omiso así das competencias propias da Xunta en materia de industria para promover a instalación da planta. Lembrou que mentres o conselleiro eludía citar á Mariña como futuro emprazamento, Feijóo tan só falaba da “provincia de Lugo” porque “ten auga, enerxía e eucalipto”.
Reclamou que “deixen de mirar para outro lado” e “traballen todos xuntos a prol dun territorio –o da Mariña- que o está a pasar mal”, e lembroulle ao presidente da Xunta que “preferentemente onde está o eucalipto é na comarca da Mariña”. Reclamoulle á Xunta que explique “que fixeron para fomentar” a opción da Mariña, e “se lle deron a coñecer a Altri a dispoñibilidade dos alcaldes e alcaldesas para que a instalación sexa unha realidade”.
Elena Candia cuestionou aos socialistas galegos “por que se desmarcan agora do acordo unánime acadado no pasado Pleno”.
Pola súa banda, a vicevoceira do Grupo Popular, Elena Candia, criticou que os socialistas galegos “pretenderan rachar co acordo unánime acadado na pasada sesión plenaria a través do que se solicitaba á Xunta que dea prioridade ao proceso de deseño da primeira fábrica de fibras téxtiles de España en Galicia, que permitiría pechar o ciclo de produción da madeira nesta Comunidade autónoma, así como que se propicie o seu emprazamento preferentemente na comarca de A Mariña e, se os criterios técnicos non garanten a viabilidade deste emprazamento, na provincia de Lugo”. O acordo incorporaba a solicitude ao Goberno de España para que estableza liñas de apoio no marco dos fondos europeos Next Generation para o desenvolvemento deste proxecto coa maior celeridade posible.
Elena Candia insistiu que “desde o PPdeG mantémonos de forma clara, contundente e concisa no acordo unánime acadado no Pleno do pasado 8 de febreiro” e cuestionou aos socialistas galegos pola “súa obsesión agora en quitar á provincia de Lugo da iniciativa que hoxe traen a este Pleno”.
A moción que rexeitou o PP reclamáballe á Xunta que fixera valer as competencias propias en materia de industria para impulsar a chegada á comarca da nova planta da firma portuguesa, dando a coñecer o emprazamento e as “enormes posibilidades que ofrece para levar a cabo o investimento”.
Ademais, reclamáballe á Xunta que promovera unha xuntanza entre a Mancomunidade de Municipios da Mariña, os alcaldes e alcaldesas da comarca e a Sociedade Impulsa coa empresa. Finalmente, propuña a constitución dun grupo de traballo coa presenza da Mancomunidade para darlle a coñecer as propostas que “supostamente” a Xunta lle remitiu ao Estado en relación cos fondos Next Generation EU e a implantación de Altri en Galicia.
